"Нима гап Apple?" рукнидан: хитойлик техноблогерлар букланадиган iPhone яратишди
Дунёдаги энг таниқли 7 та смартфон ишлаб чиқарувчи брендларнинг 6 таси: Samsung, Xiaomi, Huawei, Honor, Oppo ва Vivo аллақачон ўзларининг букланадиган смартфонларини сотувга чиқариб улгуришган, лекин уларнинг биттаси, Apple, ҳали ҳам "икки қўлини бурнига тиқиб ўтирибди". Сўнгги маълумотларга кўра, купертинолик компания яқин кунларда букламафон чиқаришни режалаштирмаган. Яқинда эса Samsung компанияси экспертлари Apple 2024 йилда букламафонлар бозорига қўшилиши маълум қилган эди.
Бироқ, хитойлик техно-блогерлар Apple'ни кутиб ўтиришмади ва улар ўзларининг букланадиган iPhone'ларини яратишди. iPhone V деб номланган ушбу прототип iPhone 13 Pro Мах'дан тайёрланган бўлиб, уни яратиш учун 40 га яқин дисплейлар синовдан ўтказилган, смартфон ички қисмлари қайта жойланган. Қолаверса, нафақат қурилма, балки дастурий таъминот ҳам "букланган" ёхуд технология ишқибозлари бузилган (jailbroken) iOS операцион тизими букланадиган экранга мослашган.
iPhone V, албатта, Galaxy Z Flip 4 ёки Motorola Razr 2022 каби ажойиб букламафон эмас, аммо, блогерлар ушбу протипни "version 0.1" деб номлашганини ва уни яхшилашда давом этишларини таъкидлашди.
