Ходимларига микрочип ўрнатаётган реал компания
Бош ва кўрсаткич бармоқ орасидаги тери остига оғриқсиз ўрнатилган микрочип киборг-ходимга айланиш учун кифоя қилади. Бу “одам-робот” танасидаги чип унга кундалик юмушларни бажаришга кўмаклашади.
Бу келажак технология ёки қайсидир асардан парса эмас. Айни пайтда швециялик компаниянинг бундай роботлашган ходимлари сони ошиб бормоқда. Epicenter — Стокгольмда фаолият кўрсатувчи компаниянинг 150 нафар ишчилари мажбурий бўлмаса ҳам, ўз хоҳишлари билан танларида гуруч донидай келадиган микрочип билан юришибди.
Бу нимага керак?
Epicenter асосчиси ва раҳбари Патрик Местертоннинг фикрича, ходимлар қулайлик учун ҳам микрочиплардан фойдаланишади. Инсон танасидаги бу имплант калит вазифасини бажаради: ёпиқ эшикларни очишга, озиқ-овқат сотиб олишда электронлашган тўлов тизими орқали пул тўлашга, принтерга буйруқ бериш ва бошқа ёпиқ электрон тизимларга киришга хизмат қилади. Микрочип бугун кўтариб юриш керак бўлган кўп нарсанинг юкидан халос қилади.
Шундай бўлса ҳам, бу каби киборглашувни ҳазм қилиш қийин. Боиси, инсон танаси муқаддас ва уни технологиянинг станциясига айлантириш хато, деган фикрдаман. Сизнинг хулосангиз фарқ қилиши мумкин.
