Хушхабар: WhatsApp’га гуруҳли аудио ва видеоқўнғироқлар функцияси қўшилди. Уни қандай текшириш мумкин?

Жорий йил май ойининг бошларидаёқ WhatsApp менссенжерида гуруҳ тарзидаги қўнғироқ функцияси жорий этилаётгани ҳақида миш-мишлар тарқалган эди. Яқинда эса ушбу функциялар аллақачон синовдан ўтказила бошлагани ҳақида ҳам ёзгандик.

ЎҚИНГ: WhatsApp’га узоқ кутилган функция жорий этилиб, у энг зўр мессенжерга айланяпти!

Шу кунларда эса WhatsApp фойдаланувчиларининг айримлари учун бу функция ишга туширилганлиги маълум бўлди. Гуруҳли аудио- ва видеоқўнғироқлар Android ҳамда iOS операцион тизимли смартфонлар эгаларида ҳам ишлай бошлаган.

Шунингдек, хабарларга кўра, ҳатто уч ойдан буён янгиланмаган WhatsApp иловаларида ҳам гуруҳли аудио- ва видеочат функцияси ишга туша бошлаган. Демак, бу функцияларни дастурчилар илованинг янги талқинига эмас, балки мессенжер серверларига жорий этишган.

Мазкур функция босқичма-босқич барча ҳудудлардаги фойдаланувчилар учун жорий этилиши кўзда тутилган. Хўш, сиздаги WhatsApp иловасида гуруҳли қўнғироқлар ишга тушган-тушмаганлигини қандай аниқлаш мумкин?

Бунинг учун мазкур мессенжер орқали биров билан овозли ёки видеода гаплашаётиб, илова интерфейсининг юқори ўнг бурчагига эътибор берасиз. Агарда шу ерда «плюс»ли одамча белгиси кўринса, демак, сизга бу функция тақдим этилибди. Шу белгича устига босиб, жорий суҳбатга контактларингиздан яна иккитагача суҳбатдош қўша оласиз.

Янги функция яқин орада барча фойдаланувчилар учун расман тақдим этилса керак. Бу борадаги янгиликларни биз билан бирга кузатинг.

ЎҚИНГ: Telegram ва WhatsApp’даги ўчирилган хабарларни ҳам ўқиш йўли топилди!