Яна бир ҳамёнбоп Samsung смартфонининг сурати ва хусусиятларини Google «сотиб қўйди»!
Эсласангиз керак – яқинда ҳали расман намойиш қилинмаган Galaxy A52 5G смартфонининг техник хусусиятлари Google Play Console маълумотлар базасида пайдо бўлган эди. Ушбу қурилманинг бешинчи авлод уяли алоқа тармоғини қўлламайдиган версияси – Galaxy A52 4G ҳам чиқиши маълум бўлган.
ЎҚИНГ: Galaxy A52 4G ҳамда A52 5G: нархлари, фарқлари ва умумий жиҳатлари
Энди бўлса Google Play Console жанубий кореялик корпорациянинг яна бир бўлажак хити – Galaxy A72 моделини ҳам «сотиб қўйди». Маълумотлар базасида унинг бешинчи авлод уяли алоқа тармоғини қўлламайдиган версияси – Galaxy A72 4G техник хусусиятлари ҳақидаги қайдлар чиққан.
Google Play Console таъкидлашича, қурилманинг 4G-версияси Qualcomm Snapdragon 720G процессорига таянган. Смартфон энг сўнгги авлод – Android 11 операцион тизим базасида ишлайди ва 6 гигабайтлик тезкор хотирага эга. Эслатиб ўтамиз, аввалроқ Geekbench сервисида унинг 8 гигабайтлик «оперативка»ли варианти текшириб кўрилган эди.
ЎҚИНГ: Ўрта нархли ўнта энг кучли смартфон (AnTuTu рейтинги, 2021 йил февраль)
Samsung ушбу янги смартфонини Full HD+ экран билан таъминлаган, унда пикселлар зичлиги бир дюймга 450 пикселни ташкил этади. Galaxy A72 модели диагоналига 6,7 дюймлик, томонлари ўзаро 20:9 нисбатли S-AMOLED дисплейга эга бўлиши кутилмоқда. Кадр янгиланиш частотаси 90 герцлик бўлган экраннинг ўзига бармоқ изи сканери ҳам интеграция қилинган.
Galaxy A72 4G селфи-камераси 32 мегапикселлик бўлиб, дисплейнинг юқори қисми ўртасидаги тирқишга ўрнатилган. Бош камера эса 64 МПлик асосий, 12 МПлик кенг бурчакли модуллардан ташқари ҳар бири 5 МПлик яна иккита датчикни ўзида жамлаган.
Смартфоннинг 5000 мА/соатлик батареяси 25 ваттлик усулда тезкор қувват олади. Уни харидорларга 128 ва 256 гигабайтлик доимий хотирали вариантларда таклиф этишади, нархи эса 449 евродан бошланади.
ЎҚИНГ: Galaxy A32 4G тақдим қилинди: 5G-версиядан арзон, лекин унисидан ҳам зўр!
