Яна битта оммабоп Redmi смартфони том маънода портлаб кетди!
Смартфонларнинг тутаб, ёниб, портлаб кетишига одатда батареяга боғлиқ бўлади. Биз бу каби нохуш ҳолатларнинг сабаб ва оқибатлари, ҳимояланиш усуллари ҳақида махсус мақола эълон қилганмиз.
ЎҚИНГ: Ўз-ўзидан ёниб кетган оммабоп Redmi смартфонини Xiaomi тузатиб ё алмаштириб бермади!
Ўтган йили биз Ҳиндистонда бир фойдаланувчининг Redmi Note 7S смартфони ёниб кетгани ҳақида, кейинроқ эса бир хитойликнинг Redmi Note 7 Pro телефони ҳам ёнганлиги хусусида ёзгандик. Куни кеча эса «Филлар ўлкаси»да яна айни шу моделдаги қурилма айнан портлаб кетган.
Гургаон шаҳрида юз берган ушбу ҳодисада жабрланувчининг айтишича, унинг чўнтагидаги Redmi Note 7 Pro смартфони ўз-ўзидан қизиб кетган. Бундан чўчиган эгаси уни чиқариб қараса – қурилма тутаб ётган экан. У дарҳол смартфонни ерга отиб, устига ўз рюкзагини ҳам ташлаган. Шундан сўнг портлаш содир бўлган; унинг натижасини эса юқоридаги ва қуйидаги расмда ҳам кўриш мумкин:
Юқоридаги биринчи суратдан ҳам кўриниб турибди – портлаш сабабли Redmi Note 7 Pro парча-парча бўлиб кетган. Лекин унинг эгаси Xiaomi сервис марказига мурожат этганида, компания вакиллари смартфон фойдаланувчининг айби билан портлаганини айтишган ва уни алмаштириб беришдан бош тортишган. Таъкидлаш керакки, телефонни у ҳали уч ойгина аввал харид қилган экан.
ЎҚИНГ: Хизмат кўрсатиш марказларида сизни қандай қилиб лақиллатишади?
