Яна икки Xiaomi смартфони MIUI 11'га ўтмоқда

Xiaomi эски қурилмаларига янги дастурий таъминот жўнатишда давом этмоқда. Android 10 базасида ишловчи MIUI 11'га ўтаётган навбатдаги икки қурилма 2018 йилнинг ёзида тақдим қилинган Xiaomi Mi Max 3 ва Xiaomi Mi 8 Lite'лардир.

Қурилмаларнинг Хитой талқини аллақачон янги дастурий таъминотга ўтиб бўлган, энди навбат глобал версияларга келди.

Xiaomi Mi Max 3'га жўнатилган янгиланиш версияси — v.11.0.1.0 QEDMIXM. Агар апдейт келишини кутишни хоҳламасангиз, Xiaomi жамияти веб-сайтига ўтиб, 1.8ГБ лик прошивкани юклаб олсангиз бўлади. Янгиланиш билан бирга қурилмангизда янги ранглар схемаси, бутун тизимда амал қилувчи Қора фон ҳамда янгиланган хавфсизлик патчларига эга бўласиз.

Xiaomi Mi 8 Lite'га келган янгиланиш версияси эса v.11.0.1.QDTMIXM бўлиб, 2.4ГБ ҳажмга эга. Апдейтдан сўнг, смартфонингиз хавфсизлик даражаси февраль ойигача кўтарилади.

Муҳим эслатма: агар телефонингизни Хитойдан сотиб олган бўлсангиз ёки дастурчи опциясини ёқиб қўйган бўлсангиз, тизимни янгилашдан олдин барча маълумотларингизни бошқа қурилма ёки булутга сақлаб қўйинг. Акс ҳолда, уларнинг барчаси ўчиб кетади.

ЎҚИНГ: Xiaomi қуввати 30 кунга етувчи, ҳимояланган смарт-соат тақдим этди