Яна куйган ҳид келяптими? Энди Redmi Note 7 Pro ёниб кетди
"Куйган Xiaomi" рукни давом этмоқда.
Бир неча ҳафта олдин Ҳиндистонда Redmi Note 7S ёниб кетганлиги ҳақида ёзган эдик.
Ўшанда Xiaomi вазиятни ўрганиб чиққан ва унинг мутахассислари бу кафолатда кўрсатилган ҳодиса эмаслигини, балки ташқи томондан салбий таъсир туфайли рўй берганини аниқлашган эди. Бу галги хабар эса Хитойда Redmi Note 7 Pro'нинг қандай ёниб кетганлиги ҳақида.
Воқеани уч ой олдин отаси учун Redmi Note 7 Pro сотиб олган шахс гапириб берди. У Хенан провинциясининг Жокоу шаҳрида истиқомат қилади. Фойдаланувчининг сўзларига кўра, смартфон кўрпа устида бўлган ва эгаси ухлаётган вақтда ўз-ўзидан ёниб кетган. Ҳодиса оқибатида эркакнинг ўзи енгил куйиш жароҳатини олган ва ўз вақтида уйғонганлиги сабабли жиддий оқибатларнинг олдини олишга эришган.
Фойдаланувчининг сўзларига кўра, смартфон зарядга уланган бўлмаган ва ёнғинни келтириб чиқарадиган салбий омиллар кўринмаган. Фойдаланувчи ҳодисадан олдин смартфонида бир нечта видео томоша қилган, холос.
Аввалги ҳолатда бўлгани каби, Xiaomi нима бўлганини батафсил ўрганишга ваъда бериб, мижозларини қўллаб-қувватлашини маълум қилган.
Вазият ўрганиб чиқилди ҳам. Ишни кўриб чиққан ходимларнинг сўзларига кўра, ёнғинга сабаб смартфоннинг нуқсони эмас, балки ташқи омиллар бўлган. Ҳодисанинг эса кафолатда кўрсатилгани тан олинмаган ва ёниб кетган Redmi Note 7 Pro'ни алмаштириб беришдан бош тортилган.
ЎҚИНГ: Смартфонларнинг энг кераксиз функцияларини биласизми?
