Яндекс харитаси Туркия ва Исроилнинг ҳарбий объектларини яширишга уриниб, аксинча – фош этиб қўйди!
Ҳозирда замонавий технологиялар Ер юзасининг турли ҳудудларини сунъий йўлдош орқали олинган суратлар ёрдамида кўриш имконини беради. Хусусан, бунда харита сервисларининг ҳиссаси катта, аммо улар айрим давлатларнинг ҳарбий сирларини фош этиб қўйиши ҳам мумкин.
ЎҚИНГ: «Яндекс» Ўзбекистонда ёғингарчиликлар харитасини ишга туширди
Америка олимлари федерацияси ходими Мэтт Корда шундай ҳолатга дуч келди – у Туркия ва Исроил давлатлари ҳудудидаги уч юзга яқин ҳарбий объектни топиб олди. Олим «Яндекс.Хариталар» сервисида бу жойлар хиралаштириб қўйилганлигини пайқаб қолган. Кейин шу объектларни Google Earth сервиси харитасидаги тасвирлари билан солиштириб кўрди. Маълум бўлишича, Яндексдан фарқли равишда, Google компанияси ўз хариталарида ҳеч бир жойни хиралаштириб қўймаган экан. Шу тариқа, бу ҳудудларда ҳарбийлар ва уларнинг техникалари жойлаштирилганлиги аниқ бўлди.
Олимнинг тахмин қилишича, Туркия ва Исроил ҳарбийлари Яндекс маъмуриятига мурожаат қилиб, махфий базаларни харитадан яширишни сўраган. Яндекс ўша жойларни хира қилиб қўяр экан, бу аксинча – эътиборни жалб этишини ўйламаган ҳам.
Корда қизиқиб кетиб, Яндекс харитаси орқали Россиянинг ҳарбий базаларини излаган, аммо бирортасини ҳам топмаган – на кўриниб турган, на хиралаштириб қўйилган махфий объект йўқ экан. Улар асосан ер остига жойлаштирилган ёки шунчаки фуқаролик объектлари орасига усталик билан яширилган.
ЎҚИНГ: Жосус-каптарлар пайдо бўлди: ҳарбийларнинг уйқуси қочмоқда