Яндексдан "Midjourney": компания ўзининг матнни суратга айлантириб берадиган нейротармоғини ишга туширди
Россиянинг Яндекс компанияси ўзининг "Шедеврум" номли матнни суратга айлантириб берадиган Midjourney нейротармоғига ўхшаш хизматининг 0.1.4 бета версиядаги мобил иловасини ишга туширди. Маълум бўлишича, Шедеврум ҳам инглиз, ҳам рус тилларини тушунади ва унга "фотореализм" ва "юқори аниқлик" каби кўрсатмалар билан суратнинг қанчалик яхши тафсилоти берилса, у шунчалик яхши сурат тайёрлаб беради. Бунда нейротармоқ суратларни "каскадли диффузия" усулида яратади: матн тавсифи олингандан сўнг, сунъий интеллект расмнинг асосий версиясини яратади ва шундан сўнг у резолюцияни (пикселлар сонини) оширади ва бир неча босқичда янги деталларни қўшади.
Компаниянинг таъкидлашича, дастурчилар "Шедеврум"ни илк бета версияга тайёрлаш учун 240 миллион матн тафсилотли суратлардан фойдланишган. Ўқитиш, ўргатиш жараёни ҳозирда 500 миллиондан ортиқ суратлар билан давом эттирилмоқда. Яндекс келаси янгиланишларда суратлар сифати янада яхшиланишини ваъда қиляпти.
"Якуний версияга қадар у баннерлар, иллюстрациялар, онлайн-дўконлар учун тасвирлар яратиш ва бошқаларни амалга ошириши мумкин бўлади", – дейди Яндекснинг Машина интеллекти ва тадқиқотлари бўлими раҳбари Алексей Гусаков.
"Шедеврум" мобил иловасини сиз App Store ёки Google Play Store орқали юклаб олишингиз мумкин.
Айтиш керакки, кеча тақдим қилинган илова шу қадар машҳур бўлдики, у App Store'нинг энг кўп юклаб олинган иловалар рўйхатида биринчи ўринни эгаллаб олди.
