Янги авлод iPhone'ларининг Pro моделлари 100 долларга қиммат бўлади

Янги авлод iPhone'ларининг Pro моделлари 100 долларга қиммат бўлади

iPhone мухлислари узоқ кутган кун яқинлашиб келмоқда. Бир неча кундан сўнг, Apple компанияси ўзининг iPhone 14 смартфонлари қаторини тақдим қилади. Айтиш керакки, бўлажак айфонларнинг ташқи кўриниши кўпчилик учун янгилик бўлмаса керак. Деярли бир йилдан бери миш-миш қилиб келинаётган янги авлон iPhone'ларининг Pro моделлари олд томонида таблетка ва юмалоқ шаклдаги тирқишларга эга бўлади. Оддий моделлар эса iPhone Х дан бери сақланиб келаётган катта қора тирқиш билан чиқарилади. Албатта, янги моделларнинг техник хусусиятлари ҳам кучайтирилади. Бироқ, ташқи ва ички томонидан ҳам кўра ҳаммани энг, энг, энг қизиқтирадиган нарса бу уларнинг нархлари десак адашмаган бўламиз.

iPhone 14 моделларининг аниқ нархи ҳақидаги маълумотлар смартфонлар тақдим қилинган кунда маълум бўлади. Аммо, кўп маротаба миш-миш қилинган маълумотлар ахийри тўғри бўлиб чиққанига ҳам гувоҳ бўлганмиз. Шундай қилиб, қуйида iPhone 14 смартфонларининг барча хотира конфигурацияларидаги узунқулоқ хабарларига кўра тасдиқланган нархлари билан танишамиз.

iPhone 14 сериясидаги смартфонларнинг таҳминий нархлари. Фото: mydrivers.com

Кўриб турганингиздек, бу йилги айфон смартфонлари Mini моделсиз тўртта: iPhone 14, iPhone 14 Pro, iPhone 14 Мах ва iPhone 14 Pro Мах моделларда чиқарилади. Уларнинг барчаси учун энг кам хотира ҳажми 128 ГБ бўлса, максимали 1 ТБ бўлади. Афсуски, янги айфонлар орасида Apple тест қилаётгани хабар қилинган 2 терабайтли модел бўлмайдиган кўринади. 

Нархларга тўхталадиган бўлсак, оддий моделлар учун ўтган йилгидек бошланғич нарх - $799 сақланиб қолган. Лекин, хурсанд бўлишга ҳали эрта, чунки Pro моделдаги iPhone 14 смартфонлари учун қўлланиладиган Apple'нинг "инновацион" тирқиш дизайни сизга $100 га қимматга тушиши мумкин. Айтмоқчимизки, iPhone 14 Pro моделлари ўтган йилги iPhone 13 Pro моделларига қараганда $100 қиммат - $1099 нархдан бошлаб чиқарилиши мумкин. Албатта, бу фақат тирқиш дизайни учун эмас. Таъкидлаш жоизки, Pro моделлар А16 чипсети билан аввалгисидан кўра анча яхшироқ камера хусусиятлари билан келади.

Аммо, лекин, бироқ, TrendForce компаниясининг айтишича, ҳозирги иқтисодиёт ҳолати ва смартфонлар бозорининг қулаши фонида Apple ўзининг янги телефонлари нархини унчалик оширмаслиги мумкин. Бозор тадқиқотчиси iPhone 14 қатори учун қуйидаги нархларни башорат қилмоқда:

  • iPhone 14: $749
  • iPhone 14 Мах: $849
  • iPhone 14 Pro: $1,049
  • iPhone 14 Pro Мах: $1,149

Юқорида айтилганидек, булар шунчаки таҳминий нархлар бўлиб, улар таҳминан 16 сентабрдан сотувга чиқарилади. Шуни алоҳида айтиш керакки, iPhone 14 қатори олдингисидан қиммат чиқса ҳам, арзон чиқса ҳам, уларни Ўзбекистонда сотиб олиш учун яна 100 доллар қўшиб қўйишни унутманг.

ЎҚИНГ: Android 14 билан тўғридан-тўғри сунъий йўлдошга уланиш мумкин бўлади