Янги бошланиш: Meizu ўз логотипини янгилади
Бир неча кун аввал Хитойнинг Meizu техногиганти ўз логотипини янгилади ва бу компаниянинг илк логотипи тақдим қилинганидан роппа-роса 20 йил ўтиб содир бўлмоқда.
Янги логотипга бир қарашда сиз М ҳарфини кўрасиз ва бу компаниянинг Meizu номидаги М ҳарфи билан боғлиқ дея табиий қабул қиласиз, лекин бу ерда бундан бошқа яширин белгилар ҳам бор. Масалан, М ҳарфини якунлайдиган нуқтани олиб ташласак, бироз қия ҳолатда турган N ҳарфини кўришимиз мумкин.
Бу инглиз тилидаги "new", яъни "янги" сўзи бош ҳарфи ҳисобланади ва компания янги саёҳат бошлаганлигини англатади. Агар бу N ҳарфига ён томондан қарасангиз, сиз Z ҳарфини кўрасиз. Бу эса Meizu сўзидаги Z ҳарфига ишора қилади. Meizu. Нуқта нимани англатиши ва бошқалар ҳақида компаниянинг ўзидан эшитинг:
"Пастки ўнг бурчакдаги нуқта чексиз оламнинг бошланғич нуқтасини, чексиз энергияга эга ўзига хосликни англатади. Логотип 45° бурчак остида ишлаб чиқилган бўлиб, унинг юқорига йўналиши чегараларсиз муҳаббат руҳини акс эттиради. Юмалоқ бурчаклар эса визуал равишда юмалоқроқ бўлиб, қаттиқликни камайтиради ва технологиянинг илиқлигини акс эттиради"
Meizu'нинг янги логотипи ҳозирча фақат компаниянинг Хитойдаги бизнеси учун амал қилади, яъни Meizu ўзининг янги кўринишини глобал бозорга кўрсатганича йўқ.
Таъкидлаш жоизки, Meizu охирги марта ўз логотипини 2015 йилда янгилаган эди.
Эҳтимол, Meizu ташкил топганидан 20 йил ўтиб унинг логотипи ўзгариши билан бирга шу кунларда тақдим қилиниши кутилаётган Meizu 20 сериясидаги флагман смартфонлар тасодиф эмас. Компания ҳақиқий comeback'га тайёрланмоқда.
