Янги iPad Pro орқасида сирли «тирқиш» бор... (+«жонли» сурат)

Купертинолик техногигант бу йил янги айфонлар билан бирга, бир нечта моделларда планшетлар ҳам тақдим этишни режалаштирган. Инсайдерлар тарқатаётган суратларда эса уларнинг турли янги элементлари кўзга ташланмоқда.

ЎҚИНГ: iPad 2018 «елкасида» ғалати тугмача бор экан

Жумладан, Slashleaks ресурсининг Twitter-аккаунтида 2018 йилги iPad Pro ғилофининг «жонли» расми эълон қилинди. Сурат тавсифида ёзилишича, бу – 10,5 дюймлик экранга эга iPad Pro 2018 ғилофи экан. Аммо, афтидан, бу ерда гап Минг-Чи Куо хабар берган 11 дюймлик дисплейли планшет ҳақида кетмоқда. Жорий йилнинг кузида намойиш этиладиган ушбу айпаднинг ромлари юпқалаштирилиши эвазига корпуси ўлчами ўзгаришсиз қолиб, экрани катталаштирилади.

Лекин ғилофнинг орқа тарафи пастки қисмида «тирқиш» борлиги ҳамманинг эътиборини тортмоқда. Айрим кузатувчиларга кўра, бу – клавиатура улаш учун қўйилган смарт-коннектор ўрнидир. Гап шундаки, iPad Pro моделига татбиқ этилаётган Face ID функцияси фақат планшетни вертикал ҳолатда тутгандагина ишлайди. Шу боисдан компания уни айнан шу ҳолатда ишлатиш имкониятларига кўпроқ эътибор қаратмоқда.

ЎҚИНГ: Янги iPad Pro: аудиотирқиш ва «Home»сиз, лекин ажойиб технологияга эга!

Агар шу гап рост бўлса, Apple мазкур айпад учун кичрайтирилган тугмачали янгича клавиатура ишлаб чиқиши керак бўлади. Шунингдек, катта планшетни тикка ҳолатида ушлаб туриш учун уни янада мустаҳкам қилишига ҳам тўғри келади.

Лекин ғилофдаги тирқиш ва планшетдаги сирли элемент ҳақида бошқачароқ тахмин ҳам бор. Apple ҳақида ёзувчи энг нуфузли журналист Марк Гурман фикрича, Apple ушбу гаджетдаги Face ID’ни горизонтал ҳолатда ҳам ишлайдиган қилиб созлайди.

Агарда шундай бўлса, орқа панелга бунақа смарт-коннектор ўрнатишдан бирор маъно чиқмайди. Бу ҳолда ушбу элемент бошқа (эҳтимол – умуман янгича) бирор аксессуарга мўлжалланган бўлиши мумкин.

Бу борадаги янгиликларни биз билан бирга кузатинг.

ЎҚИНГ: Apple'нинг кузда кутилаётган барча девайслари билан танишинг