Янги iPhone’ларнинг ён томонида ҳам сенсор экран бўлади!
Apple корпорацияси ўзининг келажакдаги смартфонларида сенсор панелни жорий этмоқчи. Купертинолик техногигантнинг ушбу янги технология бўйича патент олиш учун топширган аризаси АҚШ Патентлар ва савдо белгилари бошқармаси (USPTO) сайтида эълон қилинган.
ЎҚИНГ: Samsung антиқа смартфон патентлади – иккита сенсор экранли слайдер!
iPhone корпусининг ён қиррасида жойлашадиган бу экран турли функцияларни фаоллаштириш учун виртуал тугмачалар жойлашади. Шунингдек, бармоқ изи сканери ҳам шу ҳудудда жойлаштирилиши айтилмоқда.
2016 йилда Apple компанияси шиша норпусли, четлари қайрилма экранли iPhone учун патент олган эди. Унда дисплейнинг қайрилган ён томонларида бир қатор функцияларни бошқариш учун виртуал тугмачалар жойлаштириш назарда тутилган эди.
ЎҚИНГ: Ноодатий дизайнга эга 10 та мобиль телефон
Аммо янги патентда тасвирланган технология ушбу ғоянинг янада мақбул варианти бўлиши айтилаётир. Мини-дисплей фаол пиктограммаларни акс эттириб туради, яна унинг менюсини созлаш ҳам мумкин бўлади. Дактилоскопик сенсор ҳам шу ерга кўчирилади; аммо унинг амал қилиш ҳудуди чекланадими ёки бутун ён қирранинг ўзи бармоқ изи сканерига айлантириладими – буниси ҳозирча номаълум.
3D Touch технологияси шарофати билан iOS тизими турли даражадаги босишлардан тегишли тарзда таъсирланадиган бўлади. Бу орқали берилган буйруқларнинг қабул қилингани ҳақида фойдаланувчига вибрацияли сигнал орқали хабар қилинади.
Маълум бўлишича, Apple сенсорли ён панел технологияси бўйича патент олиш учун аризани 2017 йилнинг тўртинчи чорагидаёқ топширган экан. Бироқ iPhone’ларга унинг жорий этилиши масаласи ҳали охиригача ҳал этилмаган.
ЎҚИНГ: Apple iPhone SE 2 (2018): энг сўнгги ишончли тафсилотлар
