Янги iPhone’нинг нималари рақибларидан олинган?
Apple’нинг орзиқиб кутилаётган юбилей смартфони бу тизимдаги энг асосий янгиланиш бўлиши ваъда қилинмоқда. Аммо унинг айрим хусусиятлари барибир олдинги авлодга мансуб бошқа моделлардан ва ҳатто Android бошқаруви остидаги смартфонлардан олинган. AndroidInsider сайти ўзининг бир мақоласида шуларга тўхталиб ўтган.
Тўлиқ экранли дизайн
Айнан мана шу янгилик – «Олма» ишқибозлари кўпдан бери сабрсизлик билан кутаётган iPhone 8’нинг асосий фарқловчи хусусиятидир. Аммо бу дизайн Купертино дизайнерларининг ўз ишланмаси эмаслигини ҳам тан олиш керак. Бундай экранли қурилмалар ишлаб чиқаришни илк бор уларнинг асосий рақиби – Samsung бундан ярим йил аввал, Galaxy S8 флагмани билан бошлаб берган эди.
Органик дисплей
Apple ўзининг навбатдаги смартфонига ўрнатмоқчи бўлаётган OLED, ёки «органик» дисплейни ҳам шу пайтгача бир неча ишлаб чиқарувчилар ўз қурилмаларида самарали қўллаб келишаётир. OLED ёки AMOLED-экранли энг оммабоп смартфонларни бугунги кунда асосан Samsung, Motorola, OnePlus, ва Xiaomi ишлаб чиқармоқда.
Симсиз қувватлаш
Энергияни масофадан узатишнинг индукцияга асосланган инновацион усули ҳам Apple юбилей смартфонининг асосий хусусиятларидан биридир. Корпорациянинг Apple Watch соати ҳам, шунингдек, рақобатчи смартфонсозларнинг айрим девайслари ҳам худди шу усулда қувватга тўлдирилади. Симсиз қувватлаш модулини смартфонга интеграциялаган илк ишлаб чиқарувчи эса Palm компанияси эди.
«Уйга» тугмачасининг виртуал бўлиши
Унинг пайдо бўлиши ҳақидаги хабарлар iOS 11’нинг еттинчи бета-версияси билан чиққан эди. Гарчи моддий «Уйга» тугмачаси ўн йил мобайнида iOS бошқаруви остидаги барча гаджетлар учун рамзга айланиб қолган эса-да, Apple энди фойдаланувчининг тизим билан ўзаро алоқасини усиз ҳам оддий ва қулай шаклини таклиф этмоқда. Фақат бу усул iPhone учунгина янгилик эканини таъкидлаб кетмасак бўлмас. Бунгача эса Google, Samsung ва Essential ҳам ўз смартфонларида виртуал «Уйга» тугмачасини қўллашган.
Асосий камера модулининг вертикал жойлашуви
Янги смартфоннинг ташқи кўринишидаги кўзга ташланувчи яна бир муҳим жиҳати – бош камера модулларининг тикка жойлаштирилганлигидир. Айтишларича, бунинг асосий сабаби ARKit жиҳозлар тўплами бўлиб, унинг тўлақонли ишлаши учун объективлари вертикал жойлашиши керак бўлади. Қизиғи – мазкур хусусият бунгача ҳам Lenovo компанияси томонидан қўлланган. Унинг Project Tango платформаси билан уйғунликда ишланган Phab 2 Pro фаблети камерасида модуллар устма-уст жойланган.
