Янги тур маиший жиҳоз – илк «антимикроволновка» тақдим этилди! (+видео)
Егуликларни тезкор иситиш учун одатда микротўлқинли печдан фойдаланамиз, лекин ичимликларни тезда совитувчи шунақа мосламага ҳам эҳтиёж сезгансиз-а? Matrix Industries стартапи ана шунақа илк жиҳозни тақдим этди – унда одатий музлатгичлардаги каби фреон, иссиқлик найчалари ва ҳоказо конструкциялар умуман қўлланмаган.
ЎҚИНГ: Микротўлқинли печдан тўғри фойдаланаяпсизми?
Juno Rapid Chiller деб номланувчи ушбу маиший жиҳоз тунука банкалардаги газланган ичимликлар, бутилкали шароб кабиларни тезкор салқинлатишга мўлжалланган. Унинг ишлаши Пельтье эффекти орқали сув ва термоэлектрик элемент ёрдамида ҳароратни пасайтиришга асосланган.
«Антимикроволновка» ишлаётганида идиш мунтазам айлантириб турилади, натижада унинг юзаси совуқ сув билан чайилиб, ичимликнинг ҳароратини пасайтиради. Совитиш жараёнини кузатиб туриш учун Juno Rapid Chiller ёруғлик-диодли панель билан жиҳозланган: ичимликнинг салқинлик даражасига қараб унинг ранги қизилдан кўкка ўзгариб боради.
ЎҚИНГ: Микротўлқинли печда нималарни иситиш мумкин эмас?
Ишлаб чиқарувчининг таъкидлашича, 340 миллилитрлик стакандаги суюқликни бу гаджет 1–2 дақиқада салқинлатиб беради. Стандарт ҳажмли – 750 миллилитрлик шароб шишасини совитишга эса 3 – 5 дақиқа вақт сарфланади.
Juno Rapid Chiller фандай ишлашини қуйидаги видеода томоша қилишингиз мумкин:
Компания ушбу маҳсулотини Indiegogo краудфандинг майдончасида жамоавий молиялаштиришга қўйган ва бу лойиҳа режадаги 100 минг доллар ўрнига аллақачон 131 минг доллар маблағ жамғарган. Унда иштирок этган – олдиндан ҳақ тўлаб буюртма берган харидорларга Juno тезкор совитгичи 199 долларга тушган. Бозорга эса уни 399 долларлик нарх билан, шу йилнинг августида чиқаришмоқчи.
