Янги видео Galaxy Note 9 дизайнини тўлиқ фош этди!
Жанубий кореялик техногигантнинг кутилаётган навбатдаги фаблети одатдагиларидан икки ҳафта аввал тақдим этилиши ҳақида ёзганмиз. Шунинг учун компания аллақачон уни бенчмаркларда синаб ҳам кўрган.
ЎҚИНГ: Samsung’нинг янги флагмани Geekbench’да рекорд ўрнатди!
91mobiles нашри ҳамда таниқли инсайдер @OnLeaks куни кеча тақдим этган видеода эса Galaxy Note 9 планшетофонининг ташқи кўриниши буткул ошкор қилинган. Унда смартфоннинг ўзи эмас, балки унинг заводдаги чизмаларига таянган ҳолда компьютерда тайёрланган рендер акс эттирилган.
Инсайдерларга ишонадиган бўлсак, Galaxy Note 9 ҳам ўтган йилги Note 8 билан деярли бир хил кўринишга эга. Фақат битта йирик фарқ мавжуд бўлиб, у ҳам қурилманинг асосий камерасининг модуллари ва бармоқ изи сканери жойлашувига боғлиқ.
Компаниянинг Galaxy S9+ флагманида бош камера сенсорларини тикка жойлаб, дактилоскопик датчикни ҳам улар остига ўрнатишган. Шундан келиб чиққан ҳолда, Galaxy Note 9 фаблетида ҳам Samsung шундай ечимни қўллайди, деган тахминлар устун эди. Аммо бу фаразлар қисмангина тўғри бўлиб чиқди: @OnLeaks тақдим этган рендерга кўра, Note 9 асосий камерасининг объективлари ёнма-ён, бармоқ изи сенсори эса уларнинг остида жойлашган.
ЎҚИНГ: Кучайтирилган камерали Galaxy Note 9 тақдимот санаси ва жойи маълум бўлди
Galaxy Note 9 бошқа жиҳатлари – ўлчами, дизайни ва портларига кўра Galaxy Note 8 моделининг деярли айнан нусхаси. Мана, ўзингиз томоша қилишингиз мумкин:
Аммо Galaxy Note 9 «ички дунёси»га кўра ўз «аждод»идан жиддий фарқ қилиши кутилмоқда. Шунингдек, унинг қўшалоқ камераси ҳам янги технологиялар билан, иккита апертурали қилиб ишланишини кутиш мумкин.
Афсуски, Samsung ушбу моделда ҳам бармоқ изи сканерини экранга интеграция қилмайди. Бундай технологияни энди Galaxy S10 моделида кўрармиз балки.
ЎҚИНГ: Кутилмаган видео: Galaxy S10 тақдимотидан нақ бир йил аввал Samsung уни «бехосдан» кўрсатган экан!
