Янгиланган Galaxy Note 7 Fan Edition фаблети 7 июлдан сотувга чиқади
Samsung
Electronics’нинг якшанба куни маълум қилишича, қайтариб олинган смартфоннинг
янгиланган Galaxy
Note 7
Fan Edition версияси Жанубий Кореяда 7 июлдан савдога
чиқарилади. Унда дастлабки версиядагига нисбатан кичикроқ сиғимли батарея қўлланган,
деб ёзади
Reuters ахборот агентлиги.
Айтилишича, фаблет аккумулятори янгича хавфсизлик мезонларидан фойдаланилган
ҳолда текширувдан ўтказилган. Батареяларининг қизиш, ёниб ёки портлаб кетиш ҳолатлари
сабабли дастлабки сотилган Galaxy Note 7’лар қайтариб олингач, хавфсизлик
мезонлари қайтадан – кучайтирилган ҳолда жорий этилган. Шундай экан, янги Note 7
Fan Edition қурилмаларининг қизиши ва ёниши эҳтимоли минимум даражагача
камайтирилган.
Samsung Electronics ўз баёнотида аниқлик киритишича, Жанубий Кореяда савдога чиқариш учун 400 минг дона янгиланган Note 7 Fan Edition тайёрлаб қўйилган. Улар қайтариб олинган Galaxy Note 7 смартфонлари ва шу девайсларга мўлжалланган, аввал ишлатилмаган қисмлардан йиғилган.
Янгиланган Galaxy Note 7 Fan Edition фаблетларининг Жанубий Кореядаги нархи 699 600 вон ($611) қилиб белгиланган. Бу эса, гаджетнинг дастлабки қийматидан тахминан 30 фоизга арзон, демакдир.
Айтиб ўтиш керакки, дунёнинг энг йирик смартфонсози ўтган йилнинг
октябрь ойида – сотувга чиқарганидан тахминан икки ой ўтиб, Note 7 моделидаги
қурилмаларини ишлаб чиқаришни вақтинча тўхтатган,
сотилганларини ҳам қайтариб
ола бошлаган. Батареяларнинг ўз-ўзидан ёниб ё портлаб кетиши сабабли юзага
келган бу кўнгилсизлик оқибатида Samsung 5 миллиард доллардан ошиқ зиён кўрган.
Бундан ташқари, шу боис компаниянинг обрўси анча тушиб кетди, кейнчалик Galaxy S8 моделини чиқарибгина Samsung ўзининг обрўсини тиклаб олди.
Note 7 русумидаги гаджетларнинг ёниб кетишига фақатгина батареялардаги нуқсонлар
сабаб бўлганлиги текширувлар натижасида аниқлангач,
мазкур моделни қайта тиклаб савдога чиқаришга қарор қилинди.
Samsung компаниясининг хабарига кўра, янгиланган Galaxy Note 7 қурилмаларининг
бошқа мамлакатларда савдога чиқарилиши масаласи кейинроқ ҳал этилади.
