Янгисидан бор!
Мана, июль ойининг сўнгги кунлари ҳам ўтиб бормоқда. Ушбу охирги икки ҳафта ичида технооламда кўплаб ўзгариш ва ривожланишлар юз берди. Мана шундай янгиликлар қаторида шу муддат ичида Google Play Store'да эълон қилинган ва янгиланган иловалар ҳам бор. Айни дамда Terabayt саҳнасида июль ойининг иккинчи ярмидаги энг оммабоп Android ўйин ва иловалари топ бешталигини тақдим этамиз.
5. Элуна (Elune)
- Ҳажми: 85 МБ
- Рейтинги: 4.2
- Юклашлар сони: 100 000+
- Эълон қилинган санаси: 23 июль
Элуна'ни аввал машҳур бўлган Элуна Сага ўйинининг давомчиси, десак ҳам бўлади. Ўйин аксарият роль ўйналадиган (RPG) «Gacha» ўйинлари каби ўйналади. Маълумот учун, «Gacha» 2017 йилда оммалашган ўйин тури ҳисобланади. Турли тоифалардан бир қатор ўйинчилар танлаб олиб, уларнинг даражасини оширасиз ва рақибларга қарши жангга туширасиз. Ўйинда, шунингдек, RPG ўйинларига хос бўлган видеосеанслар, кучли сюжет, онлайн ўйнаш функцияси ва бошқа хусусиятлар мавжуд. Аммо, илова очилаётганда, баъзан кичик муаммолар юзага келади. Бироқ GAMEVIL'дагилар буни тузатишса, Элуна ушбу жанр ўйинлари ичида энг яхшиларидан бири бўлишига шубҳа йўқ. Ўйинни мана бу ердан Android'ингизга юкланг.
4. Shootout 3D
- Ҳажми: 35 МБ
- Рейтинги: 4.3
- Юклашлар сони: 1 миллион+
- Эълон қилинган санаси: 16 июль
Ўйин шартига кўра, айбсиз фуқароларни салбий қаҳрамонлардан халос қилиб, уларнинг халоскорига айланишингиз керак.
Ўйин содда ўйналади. Қаҳрамонларни ҳаракатлантириш учун чап ва ўнг томон свайпларидан фойдаланасиз. Ўқ отиш учун экранга босиш етарли, бироқ оддий фуқарони отиб қўймасликка ҳаракат қилинг. Акс ҳолда, «game over»! Ўйин охирида, ғолиб бўлиш учун ёвузлар бошлиғига қарши курашга киришасиз.
Ўйиннинг ўзига хослиги содда ўйналиши, ранг-баранг ва минимал дизайнидир. Мана бу ердан иловани юкланг.
3. Mr Bullet - Spy Puzzles
- Ҳажми: 38 МБ
- Рейтинги: 4.3
- Юклашлар сони: 5 миллион+
- Янгиланган санаси: 26 июль
Айғоқчиликка қизиқасизми? Унда, Mr Bullet сиз учун. Ўйинда сиздан душманларни йўқ қилиш учун айнан айғоқчи сифатида ҳаракатлиш талаб қилинади. Ўйин давомида нишонга олиш қобилиятларингизни намоён қилишингизга тўғри келади. Афсонавий айғоқчи сифатида ўз айёрона хислатларингизни ҳам ишга соласиз. Челленжларга тайёр бўлсангиз, иловани юкланг.
2. OnPipe
- Ҳажми: 41 МБ
- Рейтинги: 4.4
- Юклашлар сони: 1 миллион+
- Эълон қилинган санаси: 26 июль
Ўйин жуда оддий бўлиб, унда сиз совун, жўхори, майса ва бошқаларни парчалашингиз керак. Сиздан фақат тўсиқларга эҳтиёт бўлиш талаб қилинади. Парчаланган буюмларни тўплаб, уларни сотасиз. Шунда янада қизиқ бўлган кейинги босқичлар очилади. Ўйиннинг ўзига хослиги унинг соддалиги, парчаланадиган буюмларнинг хилма-хиллиги ва визуал эффектларнинг ўзига хослигидадир. Балки шу учун ҳам бир миллиондан ортиқ фойдаланувчи иловани юклагандир. 26 мингдан ортиқ изоҳларга кўра, OnPipe 4.4 балл билан баҳоланган. Сиз ҳам юкланг.
1. Gallery Go
- Ҳажми: 9 МБ
- Рейтинги: 4.4
- Юклашлар сони: 100 000+
- Эълон қилинган санаси: 23 июль
Gallery Go — Google'нинг янги иловаси. Оддий қилиб айтганда, дастур худди Google Photos каби ишлайди ва дизайни ҳам ўхшаш, бироқ ундан фарқи Gallery Go'дан бутунлай оффлайн режимда фойдаланиш мумкин. Илова расмларингизни автоматик равишда тартибга келтириб, уларни қидириб топишни осонлаштиради. Google'дагилар янги иловага, шунингдек, расмларни бошланғич даражада таҳрирлаш функциясини ҳам қўшган. Содда интерфейс ва бошқарувга эга илова қидираётганлар учун Gallery Go айни мосдир. Иловани Play Store'дан юклаш учун бу ерга босинг.
ЎҚИНГ: Интернетингиз секинми? Google сиз учун Gallery Go иловасини тақдим этди! (+видео)
