YouTube'да "ҳикоя"лар ўз якунига етмоқда

YouTube'да

Асли Reels номи билан 2017 йилда тақдим қилинган YouTube'нинг Stories функцияси йўл охирига келган кўринади – компания ушбу функцияни олиб ташлаётганлигини эълон қилди.

YouTube'нинг Stories функциясидан контент яратувчилари вақтинчалик ўзгариш ва янгиланишларни эълон қилиш, шунингдек, ўзларининг янги видеолари саҳна орти жараёнларини пост қилиш каби ҳолатлар учун фойдаланишлари мумкин бўлган. Бироқ, бугунги кунга келиб ушбу функциядан унчалик кўп одам фойдаланмаётганга ўхшайди – компаниянинг таъкидлашича Community постлари Stories'га қараганда кўпроқ коммент ва лайклар жалб қилмоқда. 

Худди Instagram'дагидек YouTube сторислари маълум вақтдан сўнг автоматик равишда йўқолар эди, фақат 7 кунда. Аммо сиз Instagram'да бўлганидек YouTube Stories'ларингизни ўз профилингизга сақлаб қўя олмасдингиз.

Айтиш керакки, YouTube'да Stories'ларнинг йўқолиши унчалик катта нарса эмас ёхуд Community постлари унинг ўрнини боса олади. Компания яқинда унга қўйилган "камида 500 та обуначилар" талабини олиб ташлади ва унинг имкониятларини кенгайтирди: энди ижодкорлар маълум вақтдан сўнг автоматик ўчиб кетадиган Community постларини яратишлари мумкин.

Stories функцияси 26 июндан ёпилади, яъни ушбу санадан эътиборан сиз ундан ортиқ фойдалана олмайсиз.

Биринчи марта Snapchat томонидан тақдим қилган Stories функциясини кўплаб ижтимоий тармоқлар ўзлаштирган бўлсада, YouTube уни "чопаётган" биринчи платформа эмас. Twitter'нинг Fleets номли вақтинчалик постлари ҳам бир йил ичида йўқолган эди. LinkedIn ҳам 2021 йилда ўзининг Stories функциясини "болталаган".

Хабарларни тез ва осон ўқиш учун Андроид иловамизни сақлаб олинг.