Зоминда монитор ишлаб чиқарилмоқда
Artel савдо маркаси Samsung бренди билан биргаликда шахсий компьютерлар учун мониторлар ишлаб чиқарувчи корхонани ишга туширди. Янги корхона Жиззах вилоятининг Зомин туманида собиқ машина-трактор парки ўрнида қад ростлади. Artel маълумотига кўра, қурилиш ишлари шу йилнинг июнида бошланиб, август ойи охирида якунига етди.
Заводда икки сменада иш олиб борилади. У йилига умумий нархи 30 млрд сўм бўлган 200 минг дона монитор ишлаб чиқариш қувватига эга. Ишчилар сони 150 нафарни ташкил этади.