ZTE Nubia флагмани: олд камераси ва экран «кемтиги» йўқ, аммо экрани ва бармоқ изи сканери иккитадан!

  •   DiMaX
  •  957
  •  28.06.2018 10:37

ZTE Nubia флагмани: олд камераси ва экран «кемтиги» йўқ, аммо экрани ва бармоқ изи сканери иккитадан!

Смартфонсозлар бошқаларидан ажралиб туриш учун ўзларининг янги қурилмаларида турлича ёндашувларга қўл урмоқдалар. Лекин бу борада етакчи компаниялардан кўра «ўртаҳол» хитойликлар яхшироқ натижаларга эришмоқда.

ЎҚИНГ: MWC 2018’да рекорд: энг антиқа дизайнли смартфонлар ва бошқа гаджетларни ким олиб келган?

Хусусан, ZTE компанияси тайёрлаётган навбатдаги Nubia флагмани ҳаммасидан ўзгача бўлиши кутилаётир. Интернет-манбалар бу гаджетнинг компьютерда тайёрланган тасвирини эълон қилишди.

Ушбу девайс корпусининг олд панелини фақат экран ташкил этади, қизиғи – унда шу каби бошқа смартфонларда қўлланган «ўйиқ» йўқ. Хўш, унда селфи-камера-чи, қаерда жойлашган? Vivo Nex моделидаги сингари – корпуснинг ичидан чиқувчи механизмга ўрнатилганми?

ЎҚИНГ: Энг инновацион, рекордчи ромсиз ва яна бир қатор технологияларда етакчи Vivo NEX смартфонлари тақдим этилди! (+видео)

Йўқ, янги ZTE Nubia флагманида умуман олд камера деган нарсанинг ўзи йўқ! Унинг орқа панелдаги ягона камераси қўшалоқ бўлиб, селфи-камера вазифасида ҳам шунинг ўзи қўлланади. Буни таъминлаш учун компания девайс корпусининг орқасига ҳам яна битта экран ўрнатган. Кутиш режимида бу дисплей сана, вақт ва билдиришномаларни акс эттириб туради. Камерани фаоллаштириш режимида эса мазкур экран объективга тушаётган манзарани намоён қилади.

Таъкидлаб ўтиш керакки, смартфоннинг орқа панелида иккинчи экран илк бор 2017 йили Meizu компанияси тақдим этган Pro 7 моделида қўлланган. Кейинроқ эса LG компанияси учта сенсор экранли буклама смартфон патентлагани ҳақида миш-мишлар тарқалди. Шунингдек, Samsung’нинг навбатдаги флагманларидан бирида ҳам иккита дисплей бўлиши айтилмоқда.

ЎҚИНГ: Nubia С18 флагмани Mi Mix 2S’дан тезкорроқ, Galaxy S9+’дан зўрроқ!

ZTE ҳозирда тайёрлаётган Nubia смартфонида нафақат экран, балки ҳатто бармоқ изи датчиги ҳам иккита бўлади. Суратларга қараганда, улар корпуснинг иккита ён қирраларига жойлаштирилган. Дактилоскопик датчикнинг бу тариқа ён томонга ўрнатилиши эса биринчи марта MEIZU M6s смартфонида қўлланган.

Дарвоқе, ZTE бу янги гаджетида анъанавий 3.5 миллиметрлик аудиотирқишни ҳам қолдирган, яна унга замонавий USB Type-C портини ҳам жойлаган. Афтидан, хитойлик смартфонсоз ўз маҳсулотларининг АҚШда сотилиши билан боғлиқ муаммога дуч келгач, ўзгача ечимларга эга янги моделлари билан эътибор қозонмоқчи.

ЎҚИНГ: Нокаутми, нокдаунми? ZTE’нинг аҳволи ҳақида

Хабарларни тез ва осон ўқиш учун Андроид иловамизни сақлаб олинг.