Andijonda texnopark ish boshladi

  •   DiMaX
  •  370
  •  22.05.2020 09:09

Andijonda texnopark ish boshladi

Prezident Shavkat Mirziyoyev Andijon shahrida Digital City nomli texnopark bilan tanishdi. Bu haqda O‘zbekiston Respublikasi Axborot texnologiyalari va kommunikatsiyalarini rivojlantirish vazirligi xabar bermoqda.

O‘QING: O‘zbek tadqiqotchisi koronavirusga qarshi qurilma yaratdi!

Yaqindagina 5,6 gektar maydonda qurib bitkazilgan ushbu majmua axborot texnologiyalari va innovatsion loyihalarni qo‘llab-quvvatlash, dasturiy mahsulotlar eksportini yo‘lga qo‘yishga qaratilgan. Hozirda bu yerga tumanlardan 328 mutaxassis jalb etilgan.

Davlatimiz rahbari yoshlar bilan suhbatda ularni doimiy o‘rganish, izlanishga chorladi.

– Juda to‘g‘ri yo‘lni tanlagansizlar. Bu – serqirra va istiqbolli soha. Sizlar boshqalardan 10-15 yil oldin yurishlaringiz kerak. Eng dolzarb yo‘nalishlar bo‘yicha dasturiy mahsulotlar yaratib, xalqimizga va xorijliklarga qulay xizmatlar ko‘rsatib, ham oilangizga, ham jamiyatimizga naf keltirishingiz mumkin, – dedi Prezident.

O‘QING: O‘zbekistonda elektron pullardan foydalanish tartibi belgilandi

Texnoparkda mahalliy yoshlar, tadbirkorlar, yangi hunar o‘rganish istagida bo‘lgan fuqarolar uchun keng qulayliklar yaratilgan. Jumladan, kovorking markazi, data-sentr, konferens-zal, kutubxona, innovatsion laboratoriya va o‘quv xonalari, biznes inkubator, media markaz, kibersport xonasi tashkil etilgan.

Tumanlarda axborot texnologiyalari bo‘yicha boshlang‘ich o‘quv kurslari bo‘ladi. Ulardan tanlab olingan yoshlar Digital City’da intensiv ravishda ingliz tiliga o‘qitilib, IT-xizmatlar ko‘rsatishga tayyorlanadi. Texnoparkdagi 76 nafar tinglovchiga mo‘ljallangan zalda yil mobaynida 2 mingdan ortiq kishini o‘qitish mumkin.

Majmuada yotoqxona va oshxona tashkil etib, sharoitlarni yanada yaxshilash, bunday texnoparklarni mamlakatimizning boshqa hududlarida ham ochish bo‘yicha ko‘rsatmalar berildi.

Shu yerda yoshlar bandligini ta’minlash, maktab bitiruvchilarini frilans bozoriga tayyorlash borasidagi ishlar yuzasidan axborot berildi.

Davlatimiz rahbari oliy o‘quv yurtiga kirolmagan yoshlar bilan manzilli ishlash, ularning qiziqish va layoqatini o‘rganib, kasbga yo‘naltirish bo‘yicha topshiriqlar berdi.

O‘QING: O‘zbekiston internet tezligi bo‘yicha dunyo reytingida 37 pog‘ona ko‘tarildi

Sayt yangiliklaridan doimiy xabardor bo'lish uchun Telegram kanalimizga qo'shiling!