Android Q ikkinchi beta-versiyada taqdim etildi – yangi imkoniyatlar bilan tanishing! (+video)
Google kompaniyasi mart oyida o‘ninchi avlod – Android Q operatsion tizimining ilk beta-talqinini namoyish etgandi. Uni faqat barcha avlod Google Pixel smartfonlari egalari o‘rnatib, sinab ko‘ra oladilar.
O‘QING: Android Q oboylari va ringtonlarini hozirdanoq o‘rnatib olishingiz mumkin!
Endi esa ushbu tizim ikkinchi beta-talqinda taqdim qilindi va uni ham faqat Google Pixel smartfonlarida sinab ko‘rish imkoni mavjud. Android Q beta 2 versiyasida o‘zgarishlar aytarli ko‘p emas va ulardan asosiylariga to‘xtalib o‘tsak.
Yangi talqinda chat bildirishnomalarini har qanday ilova ustidan qalqib chiqishi joriy etilgan:
Bundan tashqari, ilovalar endi o‘z «qumdon»idagi – qurilma xotirasida o‘ziga ajratilgan jild ichidagi barcha fayllar ustidan cheksiz ruxsatga ega. Votosuratlar, video va audiofayllarga kira olishi uchun esa ilovalarga alohida ruxsat kerak bo‘ladi.
O‘QING: Android Q bizni oddiy imkoniyatdan mahrum etadi va unga ko‘nikishga majburmiz (+video)
Android Q beta 2 talqinida ovozlarni boshqarish yanada qulaylashgan. Mitti regulyatordagi sozlamalar tugmachasiga bossangiz, turli tovush maanbalari (media, suhbat, rington, budilnik) uchun alohida opsiyalarga ega batafsil regulyator chiqadi:
Ochiq turgan ilovalarning biridan ikkinchisiga o‘tish uchun ishoralar ham endi deyarli iOS tizimidagi singari ishlaydi:
Yana bir yangilik: Android Studio dasturlash muhitiga kiritilgan Android Q emulyatori endi buklama ekranli smartfonlarni ham qo‘llab-quvvatlaydigan bo‘ldi. Ochilgan/yopilgan holda o‘lchami 7,3/4,6 dyuymlik hamda 8/6,6 dyuymlik ekranga ega qurilmalarda Android Q’ni sinab ko‘rish mumkin. Bu esa ishlab chiquvchilarga o‘z ilova va o‘yinlarini yangicha form-faktorli qurilmalarga moslashtirish imkonini beradi.
Android Q beta-talqinini sinab ko‘rish uchun mana bu havola orqali Android beta-test dasturiga qo‘shilish kerak. Bunda yangilanish Wi-Fi orqali yuklab olinadi hamda fayl va ilovalar saqlangan holda o‘rnatiladi.
O‘QING: Qaysi smartfonlar egalari Android Q’ni birinchilar qatorida sinab ko‘rishadi?