Apple «xuddi yangidek» iPhone 8 va 8 Plus’larni arzon sota boshladi
O‘tgan yili kupertinolik kompaniya o‘zining yubiley superflagmani bilan birga iPhone 8 hamda iPhone 8 Plus modellarini ham taqdim qilgan edi. Shundan bir yil o‘tib, Apple ushbu ikki modeldagi smartfonining «Rasman qayta tiklangan» versiyalarini sotuvga chiqardi.
O‘QING: Qayta tiklangan iPhone: xuddi o‘zi, ammo ancha arzon!
Ayni damda bunday smartfonlar faqatgina AQShda rasmiy savdoga qo‘yilgan, ammo keyinchalik ular boshqa mamlakatlar bozorlariga ham yetkazib berila boshlaydi.
«Xuddi yangidek» markirovkali iPhone 8 va 8 Plus modellari tillarang, kul rang va kumushrang tusli korpuslarda taqdim etiladi. Ularning barchasi faqat bir xildagi – doimiy xotirasi 64 gigabaytlik modifikatsiyadadir.
Qayta tiklangan iPhone 8 uchun 499 dollar narx belgilangan, bu esa shu modelning yangisidan 100 dollarga arzondir. iPhone 8 Plus’ning qayta tiklangani ham yangisidan yuz dollarga arzon – 599 dollardan sotilmoqda.
Darvoqe, yangi deb sotilayotgan ayfonning haqiqatan ham yap-yangi yoki qayta tiklangan smartfon ekanini aniqlay olasizmi? Buning eng oson yo‘lini mana bu maqolada batafsil ko‘rib chiqing.
