Davlat xizmatlaridan elektron foydalanish uchun lo‘nda qo‘llanma

Aholiga har tomonlama qulay va yengil bo‘lishi uchun Elektron hukumat tizimida my.gov.uz – Yagona interaktiv davlat xizmatlari portalining yangi talqini ishga tushirilgan. Xabar.uz nashri esa undan foydalanishni boshlash uchun qo‘llanma bo‘la oluvchi maqola e’lon qildi.

O‘QING: Endi elektron hukumat xizmatlari telefoningizda! (+video)

Yagona portal faoliyatini yo‘lga qo‘yishdan asosiy maqsad – aholiga davlat organlari tomonidan elektron davlat xizmatlarining sifatli va uzluksiz ko‘rsatilishini ta’minlashdir. Shu bilan birga davlat organlari faoliyati samaradorligi, tezkorligi va shaffofligini oshirish, aholi va tadbirkorlik sub’yektlari o‘rtasida axborot almashinuvini yo‘lga qo‘yishning qo‘shimcha mexanizmlarini yaratish orqali mas’uliyat va ijro intizomini ham kuchaytirishdir.

Endi fuqarolar idoralar, korxona va tashkilotlararo sarson bo‘lmay, uy yoki ishxonasidan turib ham elektron davlat xizmatlaridan foydalanishlari mumkin.

Xo‘sh, bu qanday amalga oshiriladi?

Avvalo, my.gov.uz portaliga kirib, yagona identifikatsiya tizimiga o‘tiladi.

Portalda ro‘yxatdan o‘tganlar esa taqdim etilgan shaxsiy login va paroli orqali Yagona portalda avtorizatsiyadan o‘tishlari mumkin.

Ilk foydalanuvchilar «Ro‘yxatdan o‘tish» bandini tanlab, havola etilgan so‘rovnomani to‘ldirishadi.

Dastlab jismoniy shaxsning shaxsiy identifikatsion raqami (JShShIR – bu fuqarolik pasportining quyi qismidagi 14 raqam) kiritiladi.

O‘QING: INPS va INN (STIR) raqamlarini internetdan qanday bilish mumkin?

So‘ngra pasport seriyasi va raqami, elektron pochta manzili, telefon raqami yozilib, kodli «SMS olish» tugmasi bosiladi.

Telefon raqamga SMS orqali kelgan kod tegishli maydonchaga yozilib, «Keyingi» jarayonga o‘tiladi.

Navbatdagi bosqichda Id.egov.uz tizimi uchun login va parol kiritiladi hamda «Ro‘yxatdan o‘tish» tanlanadi.

Shundan so‘ng Id.egov.uz tizimida ro‘yxatdan o‘tganlik haqidagi xabarnoma keladi va u jarayon yakunlanganini anglatadi.

Endi murojaatchi my.gov.uz portali orqali shaxsiy kabinetiga kirib, kerakli davlat xizmatlaridan bemalol foydalanishi mumkin.

O‘QING: Ish haqi summalari to‘g‘risidagi ma’lumotni endi tez va bepul – onlayn tarzda olishingiz mumkin