Ekrani kattalashtirilgan – keyingi avlod Apple Watch’ni tomosha qilamiz
Kupertinolik korporatsiya bu yil kuzda o‘zining navbatdagi avlod «aqlli» soatini rasman namoyish etilishi kutilayotir. KGI Securities kompaniyasi yetakchi tahlilchisi Ming-Chi Kuo bergan ma’lumotga qaraganda, Apple Watch Series 4 yangi dizaynda taqdim qilinadi.
Taxminlarga ko‘ra, Apple bu yil o‘z smart-soatining dizaynini o‘zgartiradi. Bu asosan displeyga tegishli – uning o‘lchami 15–20 foizga kattalashadi.
O‘QING: Apple Watch ham endi kamera va Face ID’ga ega bo‘ladi
PhoneArena nashri jurnalistlari esa, Ming-Chi Kuo prognoziga tayangan holda, to‘rtinchi avlod Apple Watch’ning ekrani qanday bo‘lishi mumkinligini tasavvur qilib ko‘rishdi. Mana, ularning xayolot mahsuli quyidagi animatsion suratda aks etgan:
Tasvirda ko‘rib turganimizdek, displeyning kattalashuvi uning atrofidagi romlarning yupqalashuvi evaziga amalga oshiriladi.
Lekin Ming-Chi Kuo fikricha, Apple Watch Series 4 modelidagi o‘zgarishlar faqat displeyning kattalashuvi bilangina cheklanib qolmaydi. Tahlilchining ta’kidlashicha, «olmali» smart-soatlarning dizayniga boshqa jiddiy yangilanishlar ham kiritiladi. Ularni endi sentyabrda batafsil ko‘rsak kerak.
