Galaxy Note 8 va iPhone 7 Plus: qay biri yaxshiroq?
Janubiy koreyalik texnogigantning mobil qurilmalari orasida hozirda eng ilg‘ori – Galaxy Note 8 fableti hisoblanadi. Aniqrog‘i, u nafaqat Samsung telefonlari ichida, balki umuman bozordagi Android-smartfonlar orasida tengsizdir.
O‘QING: Hindistonda "Yilning flagman smartfoni" ma’lum qilindi
Galaxy Note 8 ulkan va yorqin displeyi, ilg‘or protsessori, optik zumga va tezkor avtofokusga ega qo‘shaloq kamerasi kabi jihatlariga ko‘ra barcha iPhone’lardan ustundir. Unda quloqchin uchun 3,5 millimetrlik tirqish ham, ikkita SIM-karta yoki xotira kartasi uchun slot ham bor – bular foydalanuvchiga tanlash imkonini taqdim etadi. Garchi batareyasi nisbatan tezroq bo‘shab qoladigan bo‘lsa-da, tezkor quvvatlash texnologiyasi sharofati bilan 70 daqiqadayoq uning akkumulyatorini to‘ldirish mumkin.
Umuman olganda, Samsung’ning mazkur fableti ko‘p jihatdan ayfonlardan ustunliklarga ega.
O‘QING: Ring: Galaxy Note 8'ning iPhone X'ga yo‘nalgan 6 ta aniq zarbasi
Ushbu fablet qiymati doirasidagi narxlarda uning asosiy raqibi – Apple’ning iPhone 7 Plus smartfonini xarid qilish ham mumkin. Xo‘sh, mazkur ayfonning koreyaliklar flagmanlaridan ustun jihatlari nimalarda?
Garchi umumiy afzalliklar – qulay iOS interfeysi, tezkor yangilanishlar, afsonaviy Apple ekotizimi kabilarni hisobga olmaganda ham, nisbatan eski iPhone 7 Plus modeli yangi Galaxy Note 8’dan to‘rtta xususiyatiga ko‘ra baland keladi. Keling, shularga bir nazar solamiz.
O‘QING: iPhone 7 Plus: Kuchli. Ishonchli. Qimmatbaho. | To‘liq tavsif
- Korpusi Galaxy Note 8’nikidan ko‘ra yaxshiroq
Agarda asfalt yoki betonga tushib ketmasa, iPhone 7 Plus’ning metalldan yasalgan korpusiga hech nima bo‘lmaydi. Galaxy Note 8’da esa unaqa emas – mazkur fabletning shisha korpusi nisbatan tez sinadi. Qolaversa, uni ta’mirlash ham qiyin va ko‘p vaqtni oladi; hali nisbatan yangi model ekanini hisobga olsak, uning ehtiyot qismlarini topish ham mushkul. Yettinchi ayfonning «plyusli» modelini ta’mirlash va unga ehtiyot qismlar topish esa unchalik mushkullik tug‘dirmaydi.
- iPhone 7 Plus’ning ovozi yaxshiroq.
Ushbu parametr qurilmalarning dinamiklariga ham, jamlanmaning o‘zidagi quloqchinlarga ham tegishli. Samsung’ning fableti har ikkalasida ham raqibidan ortda qoladi, unga hatto AKG garniturasi ham yordam yuera olmaydi. iPhone 7 Plus’ni esa kolonka sifatida ham, pleyer tarzida ham (tag‘in hatto standart AirPods bilan) qo‘llasa bo‘ladi. iPhone’larda ovoz chiqarish etalon darajasida, bu fakt bilan kelishmaslikning iloji yo‘q.
- Akkumulyatori ko‘proq vaqtga yetadi.
Bu jihatiga ko‘ra ham yettinchi avlod ayfonning qo‘li baland keladi. To‘laqonli foydalanish sharoitlarida ham, iPhone 7 Plus’ni sutkada bir marta, yoki uxlashga yotayotgan payt quvvatlasa yetarli. Galaxy Note 8 esa bunday ishlatishda kechki paytga borib, batareyasi bo‘shaydi. To‘g‘ri, benda operatsion tizimning optimizatsiyasida ham gap ko‘p, ammo akkumulyator sig‘imi – bu misolimizda hal qiluvchi omil. Axir, bunday ulkan va yorqin ekranli qurilma uchun 3300 mA/soat kamligi kunday ravshan-ku. Ehtimol, bunday «ixcham» batareya qo‘yish bilan Samsung mazkur qurilmalarini portlashdan himoyalagandir.
- Ergonomik tomondan afzal.
Hammasi oddiy: garchi sal qiyinchilik bilan bo‘lsa-da, iPhone 7 Plus bitta kaftga o‘rnashadi va uni shu qo‘lning o‘zi bilanoq boshqarish mumkin. Galaxy Note 8 modelida esa bunaqa emas – uni kaftga joylashtirishning mutlaqo imkoni yo‘q.
Xulosalar
Kimgaki dizayn, hayratlanarli tashqi ko‘rinish, ulkan ekran va ko‘p narsani ulash erkinligi muhim bo‘lsa, Samsung Galaxy Note 8 aynan ularga mos.
Apple iPhone 7 Plus esa – ishonchli va chidamli, katta displey va ajoyib ovoz tizimiga ega smartfonni tanlaydiganlar uchundir.
To‘g‘ri, bu xulosalarga qo‘shilmaydiganlar ham ko‘plab topiladi, zero, hech kimning fikri mutlaq haqiqat bo‘lmasligi ham tabiiy-ku. Ayniqsa, Apple va Samsung ishqibozlari orasidagi bahslarda yoki iOS hamda Android tarafdorlari o‘rtasidagi tortishuvlarda biror tomonni to‘la g‘olib, deb aytish mushkul.