IIV ogohlantiradi: Telegram’da tarqalayotgan virusli dasturdan ehtiyot bo‘ling!

  •   DiMaX
  •  4313
  •  06.07.2020 17:15

IIV ogohlantiradi: Telegram’da tarqalayotgan virusli dasturdan ehtiyot bo‘ling!

Shu yil 13 iyun kuni Toshkent shahar, Yunusobod tumanida yashovchi fuqaro M.A. Ichki ishlar vazirligi portaliga ariza bilan murojaat qilgan. Uning da’vosiga ko‘ra, 12 iyun kuni soat 19:00larda Telegram messenjeridan «Uydagi_Yulduzlar» @Fan club Miz #Uyda QOLING» (@fan_club_miz) deb nomlangan kanalga kirgan va ushbu kanalga joylangan NET NOMER ANIQLOVCHI.APK faylni yuklab olganidan so‘ng uyali telefoni «blok» holatiga tushib qolgan.

O‘QING: Telegram-kanalda qizlarning telefon raqami va pornografik materiallar tarqatgan shaxs jazolandi

IIV Tezkor-qidiruv hamkorligi boshqarmasining ma’lum qilishicha, shundan so‘ng qurilmani «blok» holatidan ochish uchun +99890-200-xx-xx abonent raqamiga «Paynet» to‘lov tizimi orqali 10.000 so‘m pul mablag‘lari tushirilishi haqida xabar keladi. Arizachi ushbu pul mablag‘larini o‘tkazganidan keyin ham telefon apparati «blok» holatidan chiqmaganligini ma’lum qilib, mazkur dasturni tarqatgan shaxsni aniqlab, unga nisbatan qonuniy chora ko‘rishni so‘ragan.

Mazkur holat yuzasidan IIV Tezkor-qidiruv hamkorligi boshqarmasi xodimlari tomonidan o‘tkazilgan dastlabki tergov oldi tekshiruv harakatlari davomida fuqaro M.A. «HUAWEI TAG-L21» smartfoni tekshirib ko‘rish uchun olinib, undagi dastur ko‘chirib olingan va tekshirib ko‘rish uchun «Kiberxavfsizlik markazi» davlat unitar korxonasiga taqdim qilingan.

«Kiberxavfsizlik markazi» davlat unitar korxonasining dasturiy texnik ekspertiza xulosasiga ko‘ra, ushbu telefon apparati Telegram messenjeridagi «Uydagi_Yulduzlar» @Fan club Miz # Uyda QOLING» (@fan_club_miz) nomli kanalda tarqatilgan NET NOMER ANIQLOVCHI.APK dasturi zarar keltiruvchi virusli dastur ekanligi ko‘rsatib o‘tilgan.

Olib borilgan surishtiruv ishlari natijasida, Telegram messenjeridagi «Uydagi_Yulduzlar» @Fan club Miz # Uyda QOLING» (@fan_club_miz) nomli kanal Namangan viloyati, To‘raqo‘rg‘on tumanida yashovchi, hozirda Namangan madaniyat ixtisoslashtirilgan maktabi o‘quvchisi, 2001 yilda tug‘ilgan fuqaro M.J.ga tegishli ekanligi aniqlandi.

4 iyul kuni Namangan viloyati, To‘raqo‘rg‘on tumani IIB huzuridagi Tergov bo‘limi tomonidan fuqaro M.J.ga nisbatan Jinoyat kodeksining 278-6-moddasi 1-qismi (Zarar keltiruvchi dasturlarni yaratish, ishlatish yoki tarqatish) bilan jinoyat ishi qo‘zg‘atilib, tergov harakatlari olib borilmoqda, deyiladi Sof.uz xabarida.

Ma’lumot uchun: O‘zbekiston Respublikasi Jinoyat kodeksining 278-6-moddasida (Zarar keltiruvchi dasturlarni yaratish, ishlatish yoki tarqatish) uch yilgacha ozodlikdan mahrum qilish jazosi belgilangan.

O‘QING: YPX xodimining smartfoni bodi-kamera bo‘la oladimi?

Sayt yangiliklaridan doimiy xabardor bo'lish uchun Telegram kanalimizga qo'shiling!