Jadal ommalashayotgan 10 ta smartfon: muhim jihat va narx-navosi

Шуҳрат Сатторов
1320
25.03.2016 13:00

iPhone’dan tortib, Android gadjetlargacha turmush tarzimizda muhim ahamiyat kasb etmoqda. Deloitte tadqiqot markazining ma’lum qilishicha, smartfon foydalanuvchisi kun davomida o‘rtacha 50 marotaba “aqlli telefon”iga nazar solar ekan. Cisco kompaniyasi tomonidan 2016 yilning 1 fevral kuni e’lon qilingan hisobotda aytilishicha, 2020 yilga kelib jahondagi mobil aloqa foydalanuvchilari soni 5.5 milliard nafarga yetar ekan. 2016 yilda jahonda smartfon foydalanuvchilari soni 2 milliardga yetishi taxmin qilinmoqda.

Bu esa sifatli va arzon gadjetlarga bo‘lgan ehtiyojni oshirib yuboradi. Xalqaro bozorda xaridorgir smartfonlarning narxi o‘rtacha $350 dan $700 AQSh dollarni tashkil qiladi. Quyida ayni paytda ko‘p sotilayotgan smartfonlarni diqqatingizga havola qilamiz. Narxlar yetkazib beruvchining xizmat haqisiz ko‘rsatilgan.

Apple iPhone 6s/iPhone 6s Plus

Ko‘pchilik uchun Apple’ning ayfonlari dizayn, foydalanishga qulaylik va tezkorlikning qorishuvidan paydo bo‘lgan mukammal mobil vositalar hisoblanadi. Sifatli kamera, tezkor faoliyat, zarur dasturlar bilan ta’minlangan ushbu flagmanlar displeyi bilan ham maqtana oladi.

iPhone 6S:

E’lon qilinganidan qisqa fursat o‘tib, ya’ni 12 sentyabr kuni sotuvga chiqarilib, 28 sentyabrga qadar jahon miqyosida 13 million dona iPhone 6S hamda 6S Plus smartfonlari sotilgan. Uning korpusi uchun samolyot, raketa va sun’iy uchish moslamalari tayyorlash sanoatida foydalaniladigan mustahkam va yengil alyuminiy qotishmasi hamda qattiq shisha qoplamali Retina HD turidagi displey uyg‘unligida salobatli ko‘rinadi.

Taqdim qilingan vaqti: 2015 yil, 9 sentyabr.

iPhone 6s bahosi qo‘shimcha xotira imkoniyatlaridan kelib chiqib, $649 dollardan boshlanadi.

Narxi: $649,

iPhone 6s Plus:

Taqdim qilingan vaqti: 2015 yil, sentyabr.

Narxi: $749 dollar.

Samsung Galaxy S7/Galaxy S7 Edge

Taqdim qilingan vaqti: 2016 yil, fevral.

The Galaxy S7 va Galaxy S7 Edge smartfonlari Samsung’ning eng mukammal so‘nggi flagmanlari. Ular ayni paytda “jahonning eng yaxshi smartfoni” nomiga ham munosib ko‘rilmoqda. Kamera va displey imkoniyatlari, qorong‘uda ham suratga olish qobiliyati, akkumulyator chidamliligi, suvga bardoshliligi bilan boshqa raqiblaridan ustun.

Narxi: $700 dollar.

S7 Edge: |O‘lchamlari: 150.9 x 72.6 x 7.7 mm, og‘irligi: 157 gramm |Akkumulyator: 3,600 mAs|Displey: 5.5 dyuym (140 mm) har dyuymda 534 ppi|

Narxi: $800 dollar.

Samsung Galaxy Note 5

Taqdim etilgan vaqti: 2015 yil, avgust

Galaxy Note5 fabletining ramkasi avvalgi Note4 planshetinikidan kichik bo‘lsa ham, ularning ekran hajmi teng. Samsung AQShda katta ekranli mobil qurilmalarni ommalashtiriga erishdi. Katta ekran, kuchli akkumulyator, planshet qalamchasiga ega fablet jahonda tezda ommalashdi.

Ekran o‘chiq bo‘lgan taqdirda ham, Note 5’ning qalamchasi planshetga yozish va ularni saqlab qo‘yish imkonini beradi.

Narxi: taxminan $700 AQSh dollari

Google Nexus 5x/Nexus 6P

Google Inc. tomonidan 2015 yilning sentyabr oyida namoyish qilingan mazkur Nexus flagmanlari sifati yuqori, narxi esa raqobatbardosh smartfonlardir.

Narxi: $349 dollar.

Kattaroq ekranli Nexus 6P flagmanining korpusi metall xomashyosidan ishlangan. Nexus 5’ga o‘xshab ketsa ham, undan farqli ravishda mazkur gadjet tezkor ishlaydi va ekranning namoyish sifati ham yuqori.

Narxi: $499 dollar.

iPhone SE

Apple`ning joriy yil 21 martidagi taqdimotida namoyish qilingan ixcham 4 dyuymli iPhone SE smartfonining dizayni iPhone 5s hamda qobiliyatlari iPhone 6s`ga tegishli. Ulardan asosiy farqli jihatlari esa texnik xususiyatlari bilan bog‘liq. Yangi mahsulot M9 yonprotsessor, asosiy A9 protsessoriga ega bo‘ldi(1.85 GGs chastotali ikkita Twister yadrosi). Tezkor xotira – 2 Gb. Mazkur protsessor avvalgi A7ga qaraganda samaradorlik jihatdan ikki barobar kuchli ekani va unda Siri muntazam faol qolishi ma’lum qilindi. Mazkur smartfon iPhone 6S’dan $ 250 dollarga arzon.

Taqdim qilingan vaqti: 2016 yil, 21 mart

Mazkur gadjet 31 martdan sotuvga chiqariladi.

Narxi: $ 399 dollar.

OnePlus 2

Xitoyning OnePlus kompaniyasining mahsuloti hisoblangan OnePlus 2 — mobil qurilmalar bozorida muvaffaqiyatga erishgan OnePlus One apparatining navbatdagi avlodi hisoblanadi. Gizmodo blogida mazkur qurilmaning o‘ziga xos xususiyatlari alohida ta’kidlanadi. Unga «flagmanlar kushandasi» degan nom berilgan.

U Oxygen operatsion tizimiga, 5,5 dyuymli AMOLED (1920×1080) ekranga, Qualcomm Snapdragon 810 8 yadroli protsessoriga, Google Android 5.1 operatsion tizimiga, 4K video yozish qobiliyatiga ega 13 megapikselli asosiy va 5 megapikselli old kameraga ega. 9,8 mm qalinlikdagi qurilmaning og‘irligi 178 gramm.

Qurilma batareyasi 3300 mA quvvat olish imkoniga ega. Bugun yetakchi bayroqdor qurilmalarda barmoq izlarini sensorli skaner qilish tizimining o‘rnatilishi yangilik emas. Mutaxassislar funksional jihatdan bu qurilma shu imkoniyatga ega Samsung Galaxy Note 5, iPhone 6S qurilmalaridan yaxshiroq ekanini ta’kidlashadi.

Narxi: $349 dollar.

LG G5

Smartfonlar hayotiga yangicha kelajak olib kelgan LG G5 boshqa smartfonlar ega bo‘lmagan, ajralib chiqadigan akkumulyatorga va qo‘shimcha “do‘stlari” – aksessuarlarga ega. Uni ajratib olib, o‘rniga boshqa gadjetlarni o‘rnatish orqali, smartfon yordamida vaqtni mazmunli tashkil etish mumkin.

G5 ikkita bosh kameraga egaligi bilan raqobatda boshqa smarftonlardan ustun bo‘lishi kutilmoqda.

Qurilma Snapdragon 820 protsessori, 4 GB tezkor xotira, 2.800 mAs elektr toki sig‘imiga ega quvvat toshi — akkumulyator va Android 6.0. operatsion tizimining LG UX 5.0 talqiniga ega.

Gadjetning QHD displey 5.3 dyuymli va 2560 x 1440 piksel sig‘imiga ega.

Ilgari taxmin qilinganidek, qurilmada ikkita 16 va 8 MP bosh kameralar mavjud va ular keng — 135 darajali burchak ostidagi suratlarni olish imkonini beradi. Ya’ni, bu inson ikkala ko‘zi bilan ko‘rib turgan manzara kengligidan ham kengroq. Smartfonning old kamerasi 8 MP.

LG G5 joriy yilning 31 martidan boshlab sotuvga chiqarilishi ma’lum qilingan.

Narxi: $600 dollar.

Moto X Pure

Motorola’ning Moto X Pure – katta va yorqin ekranli gadjet Moto X Android smartfonining 3 – avlodi. U 2015 yilning iyul oyida e’lon qilingan.

|O‘lchamlari: 153.9 x 76.2 x 11.1 mm, og‘irligi: 179 gramm| Opreatsion tizim: Android 5.1.1 “Lollipop” hamda Android 6.0 “Marshmallow”| Protsessor: Qualcomm Snapdragon 808| Tezkor xotira: 3 GB| Qo‘shimcha xotira: 16, 32 va 64 GB| microSDXC qo‘shimcha xotira bo‘lmachasi 128 GB.gacha flesh xotirani qo‘llab-quvvatlaydi.| Akkumulyator: 3000 mAs, Li-ion| Displey: 5.7 dyuym (140 mm)li 2560 x 1440 (520 ppi) sig‘imga ega Quad HD IPS| Ekran himoya tizimi: Corning Gorilla Glass 3| Old kamera: 21 MP, Sony Exmor IMX230, qo‘sh fotochaqnoq, 4K video yozish| Orqa kamera: 5 MP, fotochaqnoq| Audio tizim: qo‘sh stereo ovoz uzatkich|

Narxi: $399.99 dollar (16 GB talqini).

Microsoft Lumia 950

Lumia 950 smartfoni hattoki jajji kompyuterlikka da’vo qilmoqda. U Windows 10 operatsion tizimining mobil talqini bilan ta’minlangan. Undagi “Continuum” funksiyasi gadjetni klaviatura va monitorga ulab, undan katta ekranda, Windows PC kompyuteri o‘rnida foydalanish imkonini beradi.

Taqdim qilingan vaqti: 2015 yil, 20 noyabr.

Narxi: $600 dollar.

The Motorola Droid Turbo 2

Uni “dunyoning ilk sinmaydigan ekranli smartfoni” deyishadi. Gadjet qo‘lingizdan tushib ketsa ham, xavotir olmang, uning displeyi juda pishiq. U hatto avtomobil ostida qolsa ham, “tirik” chiqar ekan. Turbo 2 smartfonini bir marta quvvatlab 2 kun undan foydalanish mumkin.

Taqdim qilingan vaqti: 2015 yil, 27 oktyabr

Narxi: $624 dollar.

Xabarlarni tez va oson o'qish uchun Android ilovamizni saqlab oling.