Montblanc aqlli bloknot tayyorlamoqda
Premium kanselyariya mahsulotlari va aksessuarlar ishlab chiqaradigan mashhur nemis kompaniyasi Montblanc o‘zini gadjetlar bozorida sinab ko‘rmoqchi. Avvalroq Montblanc Samsung Galaxy Note4 uchun eksklyuziv stilus va har qanday soatni smart-soatga aylantiradigan bog‘ichni ishlab chiqqan edi. Kompaniya ayni vaqtda Berlindan o‘tkazilayotgan ko‘rgazmada o‘zining Augmented Paper nomli smart-bloknotini namoyish etdi. Ta’kidlash kerak, bu kompaniyaning shaxsiy mahsuloti emas, balki Wacom Bamboo Spark bloknotining qayta ishlangan versiyasidir.
Montblanc gadjetni yaratishda elektromagnit-rezonans bazasidagi texnologiyadan foydalangan. Foydalanuvchi elektron panel ustiga qo‘yilgan bloknot qog‘ozida maxsus ruchka bilan yozganida, uning qaydlari avtomatik tarzda raqamli formatda saqlanib boradi.
Montblanc ruchkasi StarWalker qatoridagi model asosida tayyorlangan, bloknotning dizayni esa toza Italiya charmi qo‘llaniladigan Urban Spirit uslubida yaratilgan. Montblanc gadjet uchun Wacom kompaniyasiga tegishli mobil ilovani ham o‘ziga moslab qayta dasturlagan.
Augmented Paper bloknoti 12 tilda yoziladigan qo‘lyozma yozuvlarni (ular ichida rus tili ham bor) raqamli formatda saqlay oladi. Bloknotga o‘rnatilgan batareya sakkiz soatli ish yoki 100 betli qaydlarni yozishga yetadi. Kiritilgan qaydlar avtomatik ravishda smartfonga uzatiladi.
Aqlli bloknotning narxi – 725 dollar.