Redmi Note 9 – suvdan himoya, 48 MPlik kvadrokamera, 5020 mA/soatlik batareya va Helio G85 chipli arzon smartfon!
Xiaomi kompaniyasi 30 aprel kuni Redmi brendi ostidagi to‘qqizinchi avlod fabletlarining eng arzonini taqdim etdi. Redmi Note 9 rusumli ushbu smartfon bir qator texnik xususiyatlari va 199 dollardan boshlanuvchi narxi bilan kishini quvontiradi.
O‘QING: 33 xil Xiaomi va Redmi smartfonlariga hoziroq MIUI 12 o‘rnata olasiz! (tayyor havolalar)
Redmi Note 9 modelining ekranini kompaniya «nuqtali displey» (DotDisplay) deb atagan va bu – nuqtadek kichkina tirqishga 13 megapiksellik old kamera joylashganiga ishoradir.
Displeyning o‘lchami diagonaliga 6,53 dyuymlik, tasvir aniqligi esa Full HD+ formatida. IPS-matritsali ekran ustiga Corning Gorilla Glass 5 himoya shishasi yotqizilgan.
Asosiy kameraning to‘rtta moduli kvadrat blokka olingan va ulardan pastda barmoq izi skaneri joylashgan.
Bular – 48 MPlik asosiy sensor (f/1.79) + 8 MPlik keng burchakli modul (f/2.2, ko‘rish burchagi 118°) + 2 MPlik makroob’yektiv + 2 MPlik chuqurlik datchigi (f/2.4).
Smartfonning «elektron yuragi» – MediaTek Helio G85 protsessoriga taqdimotda katta e’tibor qaratilgan. Redmi Note 8 modelidagi Snapdragon 665 chipsetidan 21 foizga samarador bo‘lgan mazkur protsessorni «kunlik geyming» uchun maqbul variant, deyishmoqda.
Redmi Note 9 akkumulyatori ancha sig‘imdor – 5020 mA/soatlik bo‘lib, 18 vattlik texnologiya bo‘yicha tezkor quvvat oladi. Qizig‘i – smartfon jamlanmasiga 22,5 vattlik tezkor zaryadlash uskunasi kiritilgan.
Kompaniyaning da’vosiga ko‘ra, odatiy foydalanishda Redmi Note 9 quvvati ikki kundan oshiq vaqtga yetadi!
Redmi Note 9 mustahkamligini oshirish maqsadida korpusining burchaklarini kuchaytirishgan. Tag‘in uning yuzasini suvni haydovchi nanoqoplama bilan qoplashgan. Devaysni eng so‘nggi Android 10 operatsion tizim talqini bazasidagi MIUI 11 interfeysi bilan ta’minlashgan.
Shuningdek, mazkur arzon smartfon konfiguratsiyasiga kontaktsiz to‘lovlar uchun NFC chipi hamda maishiy texnika jihozlarini boshqaruv pulti sifatida qo‘llash imkonini beruvchi infraqizil port ham kirgan.
Redmi Note 9 korpusida ikkita SIM-kartadan tashqari yana microSD-karta joylashuvchi slot, quloqchin uchun 3,5 millimetrlik standart audiotirqish mavjud.
Xiaomi ushbu gadjetini may oyining o‘rtasida sotuvga chiqarishni mo‘ljallamoqda. Uning boshlang‘ich konfiguratsiyadagi – 3/64 gigabaytlik tezkor/ichki xotirali varianti uchun atigi 199 dollar narx belgilangan. Xotirasi 4/128 gigabaytlik varianti ham qimmat emas – 249 dollar turadi.