Samsung avtonomligi naq 18 soatga yetuvchi hamyonbop simsiz quloqchin chiqardi
Janubiy koreyalik yetakchi kompaniya besh yil muqaddam Level U rusumli simsiz quloqchin namoyish etgan edi. Bu – bo‘yinga taqib olinadigan ushlagichga ega, lekin smartfon yo noutbuk portiga ulanmaydigan aksessuardir. Samsung endi uning ikkinchi avlodini taqdim etib, o‘z yurtida 47 dollarga teng narx bilan sotuvga qo‘ydi.
Ushbu quloqchin Level U2 deb nomlangan bo‘lib, yangi – Bluetooth 5.0 interfeysi bilan ta’minlangan. Quloqchin pallalari 12 millimetrlik, umumiy vazni 41,5 gramm keladi. Bo‘yindagi qismida quloqchin faoliyatini boshqarish uchun to‘rtta tugmacha o‘rnatilgan.
Samsung Level U2 modelining o‘ziga xosliklaridan biri – akkumulyatorini bitta to‘ldirganda, tugagunicha 18 soat musiqa tinglash mumkin. Telefon qo‘ng‘iroqlari rejimida uning avtonomligi 13 soatga, kutish rejimida esa 500 soatga yetadi. Bu aksessuarni quvvatlash uchun korpusida zamonaviy USB-C porti qo‘llangan.
Quloqchin 20 gersdan to 20 kilogersgacha chastotali ovoz diapazonini qo‘llab-quvvatlaydi. Lekin u Samsung Scalable Codec’dan boshqa kodeklarni qo‘llab-quvvatlamaydi.
O‘QING: Xiaomi atigi 13 dollardan boshlanuvchi ikkita simsiz quloqchin taqdim etdi