Samsung «beli baquvvat» Galaxy A30 va Galaxy A50 smartfonlarini taqdim qildi

DiMaX
8777
26.02.2019 09:35

Janubiy koreyalik texnogigant o‘tgan haftada Galaxy S10 turkumidagi flagmanlarini hamda Galaxy Fold buklama smartfonini namoyish etgandi. Kecha esa u MWC 2019 doirasida o‘rta narxli A-seriyadagi ikkita yangi modelini ko‘rsatdi.

O‘QING: Hamyonbop Galaxy A50, Galaxy A30 va Galaxy A20 smartfonlari ilk «jonli» suratlarda!

Shunday qilib, Galaxy A30 va Galaxy A50 smartfonlari Samsung kompaniyasining Infinity-U displeyli ilk ikki qurilmasi bo‘ldi. Ularning ekranlari bir xilda 6.4 dyuymlik Super AMOLED-displeylar bo‘lib, Full HD+ formatida. Shuningdek, ularning «beli baquvvat» – akkumulyatorlari 4000 mA/soatlik!

Galaxy A30 hamda Galaxy A50 modellarining samaradorligini ta’minlashga Samsung’ning o‘z ishlanmasi bo‘lgan, tegishlicha 1.8 GGs va 2.3 GGs takt chastotasida ishlovchi protsessorlar mas’ul. Ammo kompaniya taqdimotda ularning modelini aytmagan; kuzatuvchilar taxminicha, bular – tegishlicha Exynos 7904 hamda Exynos 9610 chiplaridir.

Ikkita yangi model yana kameralari, xotira hajmi va barmoq izi skanerlariga ko‘ra ham farqlanadi. Galaxy A30 smartfoni 3/4 GBlik tezkor, 32/64 GBlik doimiy xotiraga, orqa paneldagi daktiloskopik datchikka ega. Uning bosh kamerasi 16 + 5 megapiksellik, old kamerasi esa 16 MPlik datchiklardan iborat.

Galaxy A50 modeliga kelsak, unda barmoq izi skaneri ekranga integratsiya qilingan. Asosiy kamera uch modulli: 25 + 5 + 8 megapiksellik bo‘lib, bulardan uchinchisi keng burchakli. Old kamera esa aniqligi 20 megapikselga teng. Bu smartfon 4/6 GBlik tezkor va 64/128 GBlik ichki xotiraga ega variantlarda taklif etiladi.

Har ikkala smartfon ham mart oyining o‘rtasida savdoga chiqarilishi aytilmoqda, aftidan, dastlab Hindistonda sotila boshlasa kerak. Afsuski, Samsung ularning narxlarini ma’lum qilmagan.