Samsung Galaxy A (2018) turkumi qo‘sh kamerali bo‘ladi
Gap-so‘zlarga qaraganda, navbatdagi flagmani – Galaxy Note 8 modeli
Samsung’ning
qo‘shaloq ob’yektivli kameraga ega ilk qurilmasi bo‘ladi. Ammo kompaniya kelajakda
bu tendensiyani davom ettirishga qaror qilgan ko‘rinadi, deb yozadi
TAS.
Yangi «sizib chiqqan» ma’lumotlarga ko‘ra, kompaniyaning hatto o‘rta narx
segmentiga mansub Galaxy A turkumi smartfonlari ham, Galaxy C turkumidagi
qurilmalari ham ikkitadan kameraga ega bo‘ladi.
Garchi shu paytgacha Galaxy A (2018) seriyasiga oid smartfonlar haqida
ma’lumotlarga ega bo‘lmasak-da, Galaxy C 10 bilan bog‘liq gap-so‘zlar tarqab
ulgurgan. Hatto uning videosini
ham saytimizda e’lon qilganmiz. Balki, aynan ushbu model Galaxy Note 8’dan ham
oldin taqdim etilar, degan taxminlar ham mavjud.
Ta’kidlash kerakki, agarda Samsung o‘zining Galaxy A hamda C turkumidagi
devayslarini qo‘shaloq kamera bilan chiqarsa, bu borada hozirda ilgarilab borayotgan
ZTE, Xiaomi va boshqa xitoylik ishlab chiqaruvchilarga munosib javob bo‘ladi. Kuchli kameralari
hamisha Samsung smartfonlarining ustun jihatlaridan biri bo‘lib kelganini hisobga
olsak, ularning qo‘shaloq bo‘lishi kompaniyaning bozorda o‘z raqobatchilarini siqib qo‘yishiga
olib kelishi mumkin.
