Samsung ixchamgina Galaxy S8 mini'ni sotuvga chiqaradi
Displey diagonalining ixcham bo‘lgani yaxshi, deb hisoblaydiganlar hozir ham ko‘p. Ayni kunda esa ixcham smartfonlarning hammasi ham bugungi ilg‘or jihatlarga ega emas. Janubiy
koreyalik axborot texnologilari ishlab chiqaruvchisi bo‘lgan Samsung
flagmanlarining mini-versiyalarini yaratish ustida ish olib bormoqda. Jumladan, yaqin kunlarda Galaxy S
turkumining so‘nggi
vakili bo‘lmish flagmanning "merosxo‘ri" -- Samsung Galaxy S8 mini nomi
bilan bozorga chiqariladi. Bu to‘g‘rida Xitoyning IThome.com resursi
xabar tarqatgan.
Yangi gadjetning 5,3 dyuymli ekran paneli tomonlar nisbati 18:9 ga teng bo‘ladi. Ya’ni o‘lchamiga ko‘ra, uni 4,7 dyuymli ekranga ega ommabop smartfonlar bilan taqqoslash mumkin. Asl Galaxy S8 kabi kichik talqinda ham ekran old panel to‘liq egallab oladi. Faqat ekranning yuqori qismidagi hoshiyasi original Galaxy S8'niki kabi o‘ta yupqa bo‘lmaydi. Galaxy S8 mini kamroq sig‘imli batareyasi bilan ham farqlanadi.
Yana bir farq -- "mini" talqinda 2017 yilning ilg‘or Snapdragon 835
platformasi emas, 2016 yilning flagman protsessori bo‘lgan Snapdragon 821 chipi
o‘rnatiladi. Aytish joizki, oddiy foydalanuvchi bu 2 protsessorning ishlash tezkorligini u qadar farqlamaydi ham.
Ekspertlarning
fikricha, Samsung Galaxy S8 mini ham ko‘zning rangdor pardasini skanerlash
texnologiyasiga ega bo‘ladi. Unga 4 Gb tezkor va
32 Gb doimiy xotira o‘rnatiladi.
Kichik
ekranli ilg‘or flagman yaratish fikri ko‘pchilik uchun ayni muddao. Ayniqsa, unda ilg‘or kamera tizimi
o‘rnatilgan bo‘lsa.
Hozircha 5.3 dyuymli Samsung Galaxy S8 Mini'ning aniq narx-navosi ma’lum emas. Original S8 bugungi kunda AQSh va Yevropada, jahon smartfon bozorlarida $800 dollardan sotilmoqda. Marketologlarning fikricha, smartfon bozorda bugungi o‘rta narxli smartfonlarga qarshi tushiriladi va $399 dollarga baholanishi mumkin.
