Samsung o'zining yangi Odyssey Neo G9 monitorini taqdim qildi
Samsung allaqachon bir qancha ulkan rezolyutsiyali monitorlarga ega, biroq kompaniya hali to'xtamoqchi emas. Kompaniyaning navbatdagi Odyssey monitori 8K formatini qo'llab-quvvatlaydi.
Bu yilgi CES 2023 tadbirida Samsung o'zining Odyssey Neo G9 - dunyodagi ilk 8K rezolyutsiyali ultra-keng monitorni taqdim qildi. Aytish kerakki, bu 2021-yilda xuddi shu, Odyssey Neo G9 nomi ostida chiqarilgan 2,499 dollar narxdagi monitorning davomchisi hisoblanadi.
AMD o'tgan yili ushbu monitorni o'zining yangi RDNA 3 grafik kartalarini taqdim qilish davomida "dunyodagi ilk 8K ultra-keng" deya barchani qiziqtirib o'tgan edi. Biroq, aytish kerakki, "8K" bu yerda marketing uchun aytilayotgan chalg'ituvchi so'z bo'lib, asl 8K to'rtta 4K – 7680×4320 bo'lsa, Samsung monitori ikkita 4K – 7680×2160 o'lchamiga ega, ya'ni Odyssey Neo G9 yonma-yon joylashgan ikkita 4K displeylardan tashkil topgan.
Garchi monitor to'liq va aniq 8K bo'lmasada, undagi piksellar soni hali ham juda ko'p. Uning qo'llab-quvvatlanishi uchun esa yangi monitor DisplayPort 2.1 texnologiyasidan foydalanadi. Ta'kidlash joizki, ushbu xususiyat ham bozordagi hech qaysi monitorda mavjud emas.
Qolgan texnik xususiyatlarga keladigan bo'lsak, 57 dyuymli, tomonlari nisbati 32:9 bo'lgan va 1000R egrilikka ega monitor 240 gerts yangilanish tezligini qo'llab-quvvatlaydi. U OLED emas, mini-LED texnologiyasiga asoslangan bo'lib, uning yuzasi jilosiz material bilan qoplangan.
Monitor narxi va qachon chiqarilishi tez kunda ma'lum bo'lishi kutilmoqda.
O'QING: Samsung o‘zining ilk Ultra noutbukini taqdim qiladi!