Soxta abituriyentlar rasmlari va ma’lumotlarini DTM o‘z rasmiy Telegram-kanalida chiqardi!

  •   DiMaX
  •  2656
  •  04.09.2019 18:16

Soxta abituriyentlar rasmlari va ma’lumotlarini DTM o‘z rasmiy Telegram-kanalida chiqardi!

Shu yilning 29 iyul – 15 avgust kunlari kunduzgi, sirtqi va kechki ta’lim shakllari bo‘yicha respublika oliy ta’lim muassasalarining bakalavriat ta’lim yo‘nalishlariga kirish test sinovlari adolatli, shaffof va belgilangan tartib asosida o‘tdi. Birgina binoga kirishda zamonaviy texnika vositalari va usullarning qo‘llanilishi shaffoflik va adolatni ta’minlash borasida keskin oldinga siljish bo‘ldi, deb yozadi Davlat test markazi.

O‘QING: Savollar varaqasini internetga chiqargan abituriyent test jarayonidayoq imtihondan chetlatildi! (+video)

Ma’lumki, avvalgi yillarda qabul jarayonida abituriyent suratga tushar va uni asl abituriyentning o‘rniga «soxta abituriyent» rasmga tushishi orqali soxtalashtirish mumkin edi. Bu o‘z navbatida amaldagi tartibning qo‘pol buzilishiga olib kelar, achinarlisi, bunday holatlarni aniqlash murakkablik tug‘dirar edi.

DTM xabariga ko‘ra, joriy yilda o‘tgan yillar tajribalaridan kelib chiqqan holda abituriyentlarni ro‘yxatdan o‘tkazishda ularning pasport ma’lumotlari va rasmlari Ichki ishlar vazirligi migratsiya va fuqarolikni rasmiylashtirish bosh boshqarmasining pasport viza tizimidan olindi va test sinovlari bo‘lib o‘tadigan binoga kirishda videofiksatsiya qurilmalari orqali abituriyentlarning shaxsi aniqlandi. Videofiksatsiya qurilmalari orqali tekshirilganda moslik darajasi past bo‘lgan hollarda, barmoq izlarini tekshirish vositalari ishlatildi.

Bu usul soxtaliklarni aniqlashda ancha qo‘l keldi. Natijada binoga kirishga harakat qilgan ko‘plab «soxta abituriyent»lar aniqlandi. Ularning barchasi belgilangan qonunchilik doirasida chora ko‘rish uchun huquqni muhofaza qilish organlari vakillariga topshirildi.

Davlat test markazi o‘zining rasmiy Telegram-kanaliga ayrim soxta abituriyentlar to‘g‘risidagi ma’lumotlarni joylashtirmoqda, toki bunday «hojatbaror»lar qilmishi, boshqalar uchun dars bo‘lsin, deyiladi xabarda.

Rasmlarda chap tomonda abituriyentlar, o‘ng tomonda abituriyentning o‘rniga test sinovlariga kirishga harakat qilgan shaxslar suratlari keltirilgan. Ularning barchasini ko‘rish uchun mana bu havola orqali o‘tishingiz mumkin.

O‘QING: Telegram dasturchilari Xiaomi va Huawei smartfonlari egalariga zo‘r maslahat berishdi