Troyan-virus bir millionga yaqin Android smartfonga zarar yetkazdi

Ko‘p hollarda bilmasdan smatrfonimizga tekshirilmagan va shubhali ilovalarni o‘rnatamiz. Vaholanki, ba’zi ilovalarda zararli viruslar mavjud bo‘lishi mumkin. hi-tech.mail.ru nashrining ma’lum qilishicha, ayni paytgacha bir millionga yaqin Android smartfonlar Android.MulDrop.924 nomli troyan-virus bilan zararlangan. Virus foydalanuvchining ruxsatisiz ilovalarni smartfonga yuklab oladi, ularni o‘rnatishni taklif etadi yoki uzluksiz reklamalarni ko‘rsatadi.

Troyan-virus foydalanuvchiga bir vaqtning o‘zida bir nechta o‘yin va ilovalarda bittadan ko‘p hisob qaydini ishlatishga yordam beradigan Multiple Accounts: 2 Accounts ilovasida aniqlangan. Chindan-da ilova o‘ziga yuklangan vazifani bajaradi, biroq zararli virusni ham tarqatadi. Virus shunisi bilan xavfliki, u foydalanuvchining ruxsatisiz ko‘plab ilovalarni yuklaydi, bu esa internet trafikning sarflanishiga olib keladi.

Ilova hozirgacha Google Play resursida mavjud. Uni yuklab olmang, bu smartfon dasturiga jiddiy zarar yetkazishi mumkin.