Vivo X60 hamda X60 Pro namoyish qilindi: Exynos 1080 protsessorli ilk smartfonlar!
O‘tgan oyda Samsung kompaniyasi Exynos 1080 rusumli mobil chipsetini taqdim qilgan edi. Xitoylik kompaniya kecha – 29 dekabr kuni uning bazasidagi birinchi qurilmalar – Vivo X60 va X60 Pro kamerofonlarini taqdim etdi.
O‘QING: Turli hududlarda eng ommabop smartfon brendlari qaysilar?
Vivo X60 hamda X60 Pro modellarining o‘zaro farqlari kam, shulardan biri – standart flagmanda tep-tekis, pro-versiyada esa chetlari qayrilma ekran qo‘llangan. Ularning har ikkalasida displeyning o‘lchami diagonaliga 6,56 dyuymlik ekran, tasvir aniqligi esa Full HD+ formatida (2376x1080 piksellik). Smartfonlar ekrani HDR10+ texnologiyasini qo‘llab-quvvatlaydi; unda kadr yangilanish chastotasi 120 gerslik bo‘lsa, sensor qatlamining diskretizatsiyasi 240 gersga teng. Displeyning yuqori qismi o‘rtasida 32 megapiksellik old kamera tirqishi ochilgan.
Yangi kamerofonlarda, yap-yangi Samsung Exynos 1080 protsessoridan tashqari, 8 yoki 12 GBlik tezkor hamda 128 yoxud 256 GBlik doimiy (UFS 3.1 standartli) xotira chiplari ishlatilgan.
Standart flagman – Vivo X60 modelining bosh kamerasi uch modulli: asosiy datchik siftida 48 megapiksellik Sony IMX598 qo‘llangan. Ikkinchi – 13 megapiksellik sensor esa keng burchakli (120 darajali) optika bilan birlashgan. Kamera jamlanmasidagi uchinchi modul esa 13 megapiksellik portret kamerasidir.
Vivo X60 Pro bosh kamerasida esa to‘rtta sensor qo‘llangan; ulardan dastlabki uchtasi xuddi sherigidagi kabi, faqat asosiy datchikning diafragmasi kichkinaroq. To‘rtinchi modul sifatida bo‘lsa 8 megapiksellik kamera qo‘llangan; u 5 karralik optik zum bilan boyitilgan.
Bundan oldingi Vivo X50 seriyasi vakillaridagi kabi, kameraning o‘ziga to‘rtta o‘qli stabilizator (Big Eye tizimi) joriy etilgan. Bundan tashqari, Vivo X60 turkumi kompaniyaning Zeiss optikali birinchi kamerofonlaridir.
O‘QING: Eng zo‘r protsessorli eng arzon 5G-flagman mutlaq rekord o‘rnatdi!
Vivo X60 hamda Vivo X60 Pro smartfonlarining yana bir qiziq jihati shundaki, ular Apple dizayneri yaratgan grafik qobiq – Origin OS bilan chiqarilgan.
Darvoqe, ikkita yangi modelning orasidagi yana bir farq akkumulyatorning tok sig‘imiga tegishli: Vivo X60 smartfoniga 4200 mA/soatlik, X60 Pro versiyasiga esa 4300 mA/soatlik batareya o‘rnatilgan. Lekin har ikkalasiga bir xilda – 33 vattlik tezkor quvvatlash texnologiyasi tatbiq etilgan.
Eng asosiysi – narxlari masalasiga keladigan bo‘lsak, standart kamerofon tezkor/ichki xotira konfiguratsiyasiga ko‘ra uch xil variantda sotiladi:
8/128 GBlik Vivo X60 modeli – $535
8/256 GBlik Vivo X60 modeli – $581
12/256 GBlik Vivo X60 modeli – $612
Vivo X60 Pro modeli bo‘lsa faqat bir xildagi – 12/256 GBlik xotira bilan, 689 dollardan taklif etiladi. Kompaniya bu flagmanlarini 2021 yil yanvardan sotuvga chiqaradi.
