Xiaomi «damini olsin» – LG metro vagonlariga oyna o‘rniga shaffof OLED-ekranlar o‘rnatdi!
«Xitoycha Apple» jahondagi ilk shaffof televizor – Mi TV Lux Transparent Edition modelini taqdim etgan. Uning birinchi partiyasi atigi bir soniyadayoq sotib tugatilgan bo‘lsa, 16 avgustda savdoga qo‘yilgan ikkinchi partiya ham o‘sha kuniyoq tugab ketgan.
O‘QING: Xiaomi dunyodagi ilk shaffof televizorning asosiy sirini oshkor etdi
Jahonning yetakchi displeysozlaridan biri bo‘lgan LG bunga shunchaki qarab tura olmadi. Shaffof ekran texnologiyasi o‘zida ham borligini namoyon etish uchun u Xitoydagi ayrim metro vagonlarida deraza oynasi o‘rniga shaffof displey o‘rnatdi!
Xabarga ko‘ra, LG Display ishlab chiqqan shaffof OLED-ekranlar hozirda Pekin hamda Shenchjen shaharlari metrolaridagi ba’zi metro vagonlarida o‘rnatilgan. Mazkur displeylarda poyezdning ayni damda qayerda harakatlanib borayotganligi, ob-havo prognozi, yangiliklar va boshqa ma’lumotlar aks etib boradi.
LG aynan nechta vagonda shunday displeylar o‘rnatgani xabar qilinmayapti. Biroq u mazkur panellarni yanada kengroq qo‘llash borasida muzokaralar olib borayotgani ma’lum. Shuningdek, buni u o‘z vatanida emas, balki raqobatchi – Xiaomi yurtida qilayotgani e’tiborli.
Eslatib o‘tamiz, CES 2018 xalqaro elektronika ko‘rgazmasiga LG yangi televizorini rulonda olib kelgan edi. Biz esa ushbu o‘rama televizorning «jonli» videolarini ham chiqarganmiz.
O‘QING: Samsung va LG o‘z yurtida Xiaomi’ning dadil hamlasiga uchradi!