Xiaomi’ning hamyonbop Pocophone F1 flagmani Geekbench’da OnePlus 6, Mi 8 va Galaxy S9+’larni ortda qoldirdi!
Hali joriy yilning 22 avgustida rasman namoyish etiladigan bo‘lsa-da, «xitoycha Apple»ning Pocophone F1 flagmani haqida deyarli barcha ma’lumotlarni bilib bo‘ldik. Hatto uning AnTuTu benchmarkidagi tekshiruv videosini ham e’lon qilganmiz.
O‘QING: AnTuTu’da eng kuchli, ammo arzon flagman – Xiaomi Pocophone F1’ni sinab ko‘rishdi! («jonli» video)
Endi esa ushbu qurilma yana bir mashhur va nufuzli sinov servisi – Geekbench’da ham imtihon topshirib ko‘rdi. Buni qarangki, ko‘p yadroli sinovda u 9000 balldan oshiq natija ko‘rsatib, OnePlus 6, Xiaomi Mi 8 hamda Samsung Galaxy S9+ flagmanlaridan ham o‘zib ketdi!
Ko‘rib turganingizdek, yakka yadroli rejimdagi sinovda ham u 2467 ballik ko‘rsatkichni namoyon etgan, bu esa faqat Samsung Galaxy S9+ flagmanining natijasidangina pastdir.
Aytish kerakki, Xiaomi Pocophone F1 modeli yakka kristalli Snapdragon 845 protsessoriga ega bo‘lgan barcha flagmanlar orasida plastik korpusli ilk qurilma bo‘layotir. Shu sababli ham u mazkur ilg‘or chipda ishlovchi eng arzon flagman sifatida maydonga tushayotir. Garchi hali rasmiy taqdimoti bo‘lib o‘tmagan esa-da, ayrim uddaburonlar allaqachon Pocophone F1’ni sotishni ham boshlab yuborishgan.
