Yana ikki Xiaomi smartfoni MIUI 11'ga o‘tmoqda
Xiaomi eski qurilmalariga yangi dasturiy ta’minot jo‘natishda davom etmoqda. Android 10 bazasida ishlovchi MIUI 11'ga o‘tayotgan navbatdagi ikki qurilma 2018-yilning yozida taqdim qilingan Xiaomi Mi Max 3 va Xiaomi Mi 8 Lite'lardir.
Qurilmalarning Xitoy talqini allaqachon yangi dasturiy ta’minotga o‘tib bo‘lgan, endi navbat global versiyalarga keldi.
Xiaomi Mi Max 3'ga jo‘natilgan yangilanish versiyasi — v.11.0.1.0 QEDMIXM. Agar apdeyt kelishini kutishni xohlamasangiz, Xiaomi jamiyati veb-saytiga o‘tib, 1.8GB lik proshivkani yuklab olsangiz bo‘ladi. Yangilanish bilan birga qurilmangizda yangi ranglar sxemasi, butun tizimda amal qiluvchi Qora fon hamda yangilangan xavfsizlik patchlariga ega bo‘lasiz.
Xiaomi Mi 8 Lite'ga kelgan yangilanish versiyasi esa v.11.0.1.QDTMIXM bo‘lib, 2.4GB hajmga ega. Apdeytdan so‘ng, smartfoningiz xavfsizlik darajasi fevral oyigacha ko‘tariladi.
Muhim eslatma: agar telefoningizni Xitoydan sotib olgan bo‘lsangiz yoki dasturchi opsiyasini yoqib qo‘ygan bo‘lsangiz, tizimni yangilashdan oldin barcha ma’lumotlaringizni boshqa qurilma yoki bulutga saqlab qo‘ying. Aks holda, ularning barchasi o‘chib ketadi.
O‘QING: Xiaomi quvvati 30 kunga yetuvchi, himoyalangan smart-soat taqdim etdi