Yangilangan Galaxy Note 7 Fan Edition fableti 7 iyuldan sotuvga chiqadi
Samsung
Electronics’ning yakshanba kuni ma’lum qilishicha, qaytarib olingan smartfonning
yangilangan Galaxy
Note 7
Fan Edition versiyasi Janubiy Koreyada 7 iyuldan savdoga
chiqariladi. Unda dastlabki versiyadagiga nisbatan kichikroq sig‘imli batareya qo‘llangan,
deb yozadi
Reuters axborot agentligi.
Aytilishicha, fablet akkumulyatori yangicha xavfsizlik mezonlaridan foydalanilgan
holda tekshiruvdan o‘tkazilgan. Batareyalarining qizish, yonib yoki portlab ketish holatlari
sababli dastlabki sotilgan Galaxy Note 7’lar qaytarib olingach, xavfsizlik
mezonlari qaytadan – kuchaytirilgan holda joriy etilgan. Shunday ekan, yangi Note 7
Fan Edition qurilmalarining qizishi va yonishi ehtimoli minimum darajagacha
kamaytirilgan.
Samsung Electronics o‘z bayonotida aniqlik kiritishicha, Janubiy Koreyada savdoga chiqarish uchun 400 ming dona yangilangan Note 7 Fan Edition tayyorlab qo‘yilgan. Ular qaytarib olingan Galaxy Note 7 smartfonlari va shu devayslarga mo‘ljallangan, avval ishlatilmagan qismlardan yig‘ilgan.
Yangilangan Galaxy Note 7 Fan Edition fabletlarining Janubiy Koreyadagi narxi 699 600 von ($611) qilib belgilangan. Bu esa, gadjetning dastlabki qiymatidan taxminan 30 foizga arzon, demakdir.
Aytib o‘tish kerakki, dunyoning eng yirik smartfonsozi o‘tgan yilning
oktyabr oyida – sotuvga chiqarganidan taxminan ikki oy o‘tib, Note 7 modelidagi
qurilmalarini ishlab chiqarishni vaqtincha to‘xtatgan,
sotilganlarini ham qaytarib
ola boshlagan. Batareyalarning o‘z-o‘zidan yonib yo portlab ketishi sababli yuzaga
kelgan bu ko‘ngilsizlik oqibatida Samsung 5 milliard dollardan oshiq ziyon ko‘rgan.
Bundan tashqari, shu bois kompaniyaning obro‘si ancha tushib ketdi, keynchalik Galaxy S8 modelini chiqaribgina Samsung o‘zining obro‘sini tiklab oldi.
Note 7 rusumidagi gadjetlarning yonib ketishiga faqatgina batareyalardagi nuqsonlar
sabab bo‘lganligi tekshiruvlar natijasida aniqlangach,
mazkur modelni qayta tiklab savdoga chiqarishga qaror qilindi.
Samsung kompaniyasining xabariga ko‘ra, yangilangan Galaxy Note 7 qurilmalarining
boshqa mamlakatlarda savdoga chiqarilishi masalasi keyinroq hal etiladi.