Уфалик ихтирочи телефонни гулхандан қувватловчи ускуна яратди
Уфада яшовчи Айдар Хайруллин телефон батареясини қувватлаш учун электр энергияси талаб қилмайдиган печь-зарядка ясади, дея хабар беради Футурист нашри.
Қурилма кичкина мангалга ўхшаб кетади, уни ясаш унча қийин ҳам эмас. Ускунанинг асосий детали – печнинг иссиқлигини электр энергиясига айлантириб берувчи генератордир. Генераторни шу печнинг деворига илиб қўйилса ва унга телефон уланса бас.
Мана, қуйидаги видеолавҳада бунга ўзингиз гувоҳ бўлинг:
Дарвоқе, телефонни печдан қувватлаб тўлдириш ҳам худди электр манбаидан тўлдирганчалик вақт олади.
Айдар Хайруллин бу ихтироси учун иккита грант олган. Ҳозирда у ўз қувватлаш қурилмасини оммавий ишлаб чиқаришни йўлга қўйган. Ўзининг айтишича, буюртмачилар орасида Буюк Британия ва АҚШлик сайёҳлар ҳам бор экан. Дастлабки юз нафар буюртмачи аллақачон антиқа қувватлагични олган, дейилади хабарда.