2017 йилда "энг кўп кўчирилган" смартфонлар аниқланди
Кореялик ахборот технологиялари ишлаб чиқарувчиси бўлган Samsung томонидан 2016 йилда тақдим қилинган телефон аппарати 2017 йилда нисбатан қуйидаги смартфон ишлаб чиқарувчиларни энг кўп илҳомлантирган смартфон деб топилди.
Таниқли AnTuTu бенчмарки томонидан 2017 йилда энг кўп кўчирилган, яъни дизайни ва технологик ечимига тақлид қилинган энг оммабоп смартфонлар рейтинги тузилди. Унга кўра, Samsung Galaxy S7 Edge телефон аппаратининг шакл-шамойили ва техник жиҳатлари ўтган йилда энг кўп "ўғирланган" бўлиб чиқди.
AnTuTu экспертларига кўра, Samsung компанияси смартфонлари 2017 йилда ҳаммадан ҳам кўп кўчирилган ва жаҳон миқёсида ишлаб чиқарилган смартфонларнинг 36,2% и айнан шу бренднинг маҳсулотларига тақлид қилган экан.
Рейтингда иккинчи ўринда Apple (7,7%), учинчи ўринда — Xiaomi (4,7%) турибди. Тўртинчи ва бешинчи ўрин Oppo ҳамда Huawei (4,4% ва 3,4%) брендларига насиб қилган.
Samsung Galaxy S7 Edge смартфон ишлаб чиқарувчиларни энг илҳомлантирган девайс бўлган бўлса, Galaxy S7 модели "нуқта-вергулигача" энг кўп кўчирилган телефон бўлиб чиқди. Apple корпорациясининг iPhone 7 Plus модели, OnePlus 3T моделларининг технологик ва дизайн ечимлари ҳам бошқа смартфон ишлаб чиқарувчилари томонидан маҳорат билан "ўзлаштирилган".
Ўзига хос жиҳати шундаки, 2017 йилда "ўзлаштирилган" смартфонларнинг деярли барчаси 2016 йилда тақдим қилинган. Бенчмаркда 2017 йилда жами 17,4 млн дона мобил қурилма синовдан ўтказилган бўлса, уларнинг 2,6% қисми "клон"лар бўлган.
