Android Европадаги ўрнини мустаҳкамламоқда, iOS эса кучсизланмоқда
Android’нинг мобил операцион тизимлар бозоридаги улуши йилдан-йилга ўсиб, амалда чекланмаган монополия даражасига яқинлашмоқда, деб ёзади Droider.ru.
Kantar таҳлил компанияси экспертлари хулосасига кўра, сўнгги икки йил ичида Google томонидан ишлаб чиқилган операцион тизим Европада ўз кўрсаткичларини сезиларли оширишга муваффақ бўлган.
Германия, Франция, Буюк Британия, Италия ва Испанияда тизим бозорнинг 75,6 фоизини эгаллаб олган, бу икки йил аввалги кўрсаткичдан 7,1 фоизга кўп.
Kantar’нинг ҳисоб-китобларига кўра, Европадаги янги Android’чиларнинг 6,6 фоизи бунгача Windows Phone’нинг, 3,3 фоизи эса iOS’нинг доимий фойдаланувчиси бўлган.
Қайд этишларича, Apple томонидан ишлаб чиқилган мобил операцион тизимнинг Европа бозоридаги улуши сўнгги уч ой ичида 20,2 фоиздан 18,9 фоизгача қисқарган.
Таҳлилчилар Android смартфон ишлаб чиқарувчилар орасида Samsung ва Motorola’ни алоҳида эътироф этган. Galaxy S7 сўнгги чорак давомида энг кўп сотилган беш смартфондан бирига айланган бўлса, Motorola Европа бозоридаги улушини 6,9 фоиздан 9,8 фоизгача оширган.
