Apple дўконига кирган эркак ўнлаб iPhone’ларни синдириб ташлади (видео)
Францияда жойлашган Apple Store дўконига кирган эркак ўнлаб Apple маҳсулотларига зарар етказди. У компаниянинг маҳсулотларга кафолат хизматини кўрсатиш сервисидан қониқмагач, шундай қилишга қарор қилган.
Ҳодиса Франциянинг Дижон шаҳридаги Apple дўконларининг бирида содир бўлган. Apple компаниясининг кафолат хизматидан ғазабланган мижоз дўконга кириб, пўлат соққа билан дисплейда турган қурилмаларни бирин-кетин синдиришни бошлаган. Видеода кўриниб турганидек, мижоз қаҳр билан қурилмаларга “ҳужум қилган”. У iPhone, iPod Touch ва ҳатто MacBook Air қурилмасига зарар етказган.
Эркак дўконнинг хавфсизлик хизмати келгунча, “олма”ларни ҳузур билан синдиришда давом этган. У дўкон ходимларидан қочишга уринган, бироқ барибир қўлга туширилган.
