Банкомат хатолигини топган дастурчи улардан бир йилда миллион доллар ўмарди
Хитойда 43 яшар дастурчи Цинь Цишень бир йилда 7 миллион юань, яъни тахминан бир миллион доллар ишлаб олди. Бунда у ўзининг собиқ иш берувчиси – Huaxia Bank банкоматлари ҳимоясидаги заифликдан фойдаланган.
ЎҚИНГ: Ўзбекистонлик «хакер»лар банкоматни 15 дақиқада «бузиб», халқаро танловда учинчи бўлишди
Цинь Цишень тасодифан банкнинг компьютер тизимидаги бир хатоликни пайқаб қилган: агарда тунги соат 00:00 га яқин пайтда банкоматдан пул ечиб олинса, пул берилар экан-у, лекин ҳисобдан ўчирилмас экан. Дастурчи кичкина скрипт ёзиб, банк серверида хакерлик ишини амалга оширган. Шу боис муваффақиятсиз транзакциялар тизимда акс этмайдиган ва бу ҳақда банкка хабар бормайдиган бўлган.
Шу тариқа, 2016 йилнинг ноябридан буён Цишень ушбу банкнинг банкоматларидан жами 1538 марта нақд пул ечиб олган. Пулларнинг йўқолганлигини банк 2018 йилнинг январига келиб пайқаган ва ўғрини ҳам тезда аниқлаб, полицияга топширган.
Аммо воқеаларнинг кейинги ривожи қизиқ: хакер ўзи ўмарган маблағларнинг барчасини банкка қайтарган. Банк эса аризани қайтариб олмоқчи бўлган ва полицияга: «Цишень ўзи тизимнинг хавфсизлигини текшириб юрганди», деган. Бироқ полиция бунга ишонмаган, чунки дастурчи бу пулларни ўз шахсий ҳисобига ўтказиб келган, бир қисмини акцияларга тикиб, яна анча-мунча пул ҳам ишлаб олган экан. Энди эса Цинь Цишень ўн йиллик қамоқ жазоси кутмоқда.
ЎҚИНГ: Фирибгарлар қармоғи. Пластик картадаги пулларингиз жойидами?
