Bitcoin қиймати биринчи марта 3500 доллардан ошди
Bitcoin криптовалютаси курси янги рекордларни уришда давом этмоқда. Ўтган дам олиш кунлари давомида Bitcoin қиймати 3000 долларлик довондан ўтгани эълон қилинган эди. Бугун эса навбатдаги психологик марра – 3500 долларлик қийматдан ўтилди, деб ёзади ITC.ua.
Кун бошида криптовалюта қиймати 3430 доллар атрофида эди. Курс 3390,56 долларгача тушгач, сўнг 3500 долларгача кўтарилди. Кейинроқ курс яна 3450 долларгача пасайиб, маълум вақт ўтгач 3525,04 долларгача кўтарилди. Мазкур хабар тайёрланаётган вақтда биткоин нархи 3482,95 доллар эди, криптовалютанинг умумий капитализацияси эса қарийб 57,5 миллиард долларга тенг эди.
2017 йилнинг май ойида Bitcoin криптовалютаси илк бор 2000 долларлик довонни босиб ўтган, июнь ойи бошида эса 3000 долларлик қийматга яқинлашган эди. Сўнг кутилмаганда кескин қадрсизланиб, бир биткоин нархи 2666 долларга тушиб қолган эди. Июль ойида эса криптовалюта курси сўнгги икки ой ичида биринчи марта 2000 доллардан пастга тушиб кетди.
Криптовалюта курсининг ҳозирги ўсиши бир неча кун у икки турга – классик биткоин (BTC) ва Bitcoin Cash (BCC)га бўлингани билан боғлиқ. Мазкур қарор блокда “жойлар” қолмагани ва узун “навбатлар” сабаб юзага келган – баъзан битта пул ўтказмасининг ўтишини бир неча кунлаб кутишга тўғри келаётган эди.
