Huawei "P20" тақдимоти олдидан Samsung ва Apple билан ўчакишмоқда
Huawei компанияси 27 март куни P20 ва P20 Pro смартфон моделларини тақдим қилишга жиддий киришган. P20 Pro моделидаги бош камера учта камера модулларига эга бўлгани билан ўзига хосдир. Улардан бири 40 мегапиксел аниқлигидаги сурат олса, иккинчиси 20 мегапикселли монохром, яъни оқ-қора суратлар олишга уста бўлади. Учинчи -- 8 мегапикселли telephoto-модули эса тасвир сифатини йўқотмаган ҳолда манзарани 3 карра яқинлаштириш маҳоратига эга бўлган.
Шу билан бирга, девайс камераси секундига 960 та кадр муҳрланган секинлаштирилган видеолар тасвирга олади. Камерадаги IR-RGB, лазерли автофокус фукнцяилари ҳам тасвир сифатига ижобий ҳисса қўшади.
Олд камера ҳам ниҳоятда илғор -- 24 мегапикселли.
Техник жиҳатлар диққатга сазовор бўлса ҳам, Huawei бу галги тақдимотдан аввал ўзини тутиб тура олмаяпти ва рекламанинг антиқа усулидан фойдаланмоқда. Гап шундаки, янги смартфонларнинг рекламаси учун ёлланган микроавтобуслар Лондон марказида, аниқроғи Apple ҳамда Samsung компанияларининг расмий дўконларининг қаршисидан ўрин эгаллашган.
Автобусларга туширилган баннерларда эса «сабрли бўл» ҳамда «кутгин» каби ёзувлар туширилган.
Компания шу тарзда харидорларни Apple ва Samsung флагманларини харид қилишдан чалғитмоқчи ва Huawei P20 ва P20 Pro харид қилишга уринмоқда. Яхши уриниш! Қолаверса, Лондон кўчалари бўйлаб асфальтга тақдимот санаси ва «#HuaweiP20» ҳештеги билан реклама ёзувлари ҳам туширилган.
Huawei P20 модели Huawei Mate 10 смартфонига ўрнатилган Kirin 970 процессори билан таъминланиши кутилмоқда. 8 ядроли ушбу чипнинг частота тезлиги 2,4 гигагерц. Бу дегани мазкур смартфон самарадорликда Samsung Galaxy S9'дан анча орқада бўлади. Телефон Android 8.1 операцион тизими бошқаруви остида ишлайди.
P20 модели 3400 мА соат, P20 Pro 4000 мА соат ток сиғимига эга батареяси билан ўзига хос бўлади. P20 ҳам, P20 Pro ҳам microSD картасини қўллаб-қувватламайди.
Huawei P20 Pro модели эса 6.1 дюймли OLED панели билан ажралиб туради. Бу экраннинг пиксел сиғими 1080x2240 белгига тенг. Экран юқорисида iPhone X'ники каби ўйиқ ҳам бўлади. Шунингдек, бу талқин нисбатан илғор Kirin 920 чипи билан таъминланади.
P20 Pro 899, P20 эса 679 евро баҳосида сотувга чиқарилади. Шунча саъй-ҳаракатга яраша флагманлар жамоатчилик томонидан қандай кутиб олинишини катта қизиқиш билан кутамиз.
